На интернет се појавија и фотографиите и снимките од наследникот на моделот Fiat Punto Evo и Fiat Palio, а тоа е новиот модел наречен Argo што прво ќе биде промовиран во Бразил. Возилото е „фатено“ за време на тестирањето на патеката Куритуба во Бразил.
Argo е долгоочекуваниот наследник на моделот што во Европа се прoдаваше под името Punto. Сега Argo користи иста архитектура како и последниот модел што го промовираа Италијаните, Fiat Tipo – односно платформата Small Wide. Истата платформа Fiat ќе ја искористи и за малиот нов седан што сега го има кодното име Fiat X6S, што пак треба да ги замени моделите Fiat Linea и Fiat Siena.
За Fiat Argo ќе има три нивоа на опременост – Attractive, Essence и Sporting, и три различни мотори. Базично ќе биде претставен 1.0 литарски бензински, трицилиндричен мотор FireFly со моќност од 72 КС, и максимален вртежен момент од 102 Нм. При работа на етанол истио тмотор ќе има 77 КС и 107 Нм вртежен момент. Стандардно ќе има петстепен механички менувач.
Втор мотор во понудата е 1.3 литарски четирицилиндричен FireFly мотор со моќност од 101 КС и 134 Нм вртежен момент. Кога ќе користи етанол ќе има 109 КС и 139 Нм вртежен момент. Тука покрај основниот петстепен менувач ќе може да се порача и петстепен роботизирана aвтоматска кутија Dualogic.
Врв на понудата е 1.8 литарскиот двигател E.Torq EVo со моќност од 135 КС и 184 Нм вртежен момент при користење бензин, а кога ќе се користи етанол ќе има 140 КС и 190 Нм. вртежен момент. Тука ќе има шестстепен автоматски менувач.
