* Раст два месеца по ред: По слабото лето, европскиот пазар на автомобили повторно оживува.
* Хибридите во фокус: Продажбата на хибридни модели скокна за над 14%, а плаг-ин хибридите бележат рекорден раст од преку 50%.
* Електричарите напредуваат: Батериските електрични возила пораснаа за 30%, а нивниот удел се приближува до 16% од пазарот.
Продажбата на нови автомобили во Европската Унија порасна и во август, втор месец по ред, покажува извештајот на Асоцијацијата на европски производители на автомобили (ACEA).
Во август биле регистрирани 677.786 нови автомобили, што е раст од 5,3% во однос на истиот месец минатата година. Јулските бројки веќе најавија позитивен тренд со скок од 7,4%, па август го потврди постепеното стабилизирање на пазарот по остриот пад на почетокот на летото.
За периодот јануари – август, сепак, пазарот покажува стагнација, со вкупно 1,71 милиони продадени возила, речиси исто како лани.
Водечките пазари со различни резултати
-
Шпанија забележа најголем скок – дури +17,2%.
-
Германија, најголемиот европски пазар, растеше со темпо од +5,3%.
-
Франција има минимален раст од +2,2%,
-
Италија дури и забележа благ пад на продажбата.
Овие бројки покажуваат дека закрепнувањето не е рамномерно, и дека дел од јужните пазари сè уште се борат со послабата побарувачка.
Хибридите ја преземаат доминацијата
Хибридните електрични возила се апсолутни победници – продажбата им скокнала за 14,1%, со скоро 230.000 продадени единици во август. Според ACEA, оваа категорија ги вклучува целосните и делумните хибриди, кои во просек можат до 60% од времето да возат само на електричен погон.
Продажбата на plug-in хибридите направи вистински бум – раст од 54,4% и повеќе од 70.000 нови регистрации.
И батериските електрични возила (BEV) напредуваат со раст од 30,2%, надминувајќи 120.000 регистрирани автомобили во август.
Од друга страна, класичните бензинци и дизели бележат силен пад:
-
бензинците се намалени за 16,3% (на околу 178.000 возила)
-
дизелите исто така паднаа за околу 16%, на само 59.000 единици.
Ова значи дека хибридите по продажба повторно ги надминаа бензинците – важен пресврт на европскиот пазар.
Борбата на големите играчи
Во периодот јануари – август, уделот на хибридите порасна на 34,7%, и се приближи до комбинираниот удел на бензинците и дизелите кој падна на 37,5%. Батериските електричари веќе заземаат 15,8% од пазарот, а plug-in хибридите 8,8%.
Во сегментот на електрични возила и хибриди, лидер е SAIC Motor со речиси 137.000 продадени автомобили, што е раст од 33% во однос на минатата година, и покрај високите европски царини од 35,2%.
Следат Tesla со речиси 86.000 и BYD со 68.000 продадени возила.
Високите царини наметнати од Европската комисија минатата година (17% за BYD и 7,8% за Tesla) значително го зголемија ценовниот притисок на пазарот, но податоците покажуваат дека кинеските брендови и понатаму успеваат да освојуваат пазарен удел.
