Македонскиот автомобилски пазар наскоро би можел да добие уште едно звучно кинеско име. Се појави Facebook профил под името „Changan Macedonia“, а профилот го сподели и Даниел Воиновски од Еуроимпекс, што е прилично јасен сигнал дека се подготвува влез на Changan на домашниот пазар.
Во овој момент, сепак, нема официјално соопштение со кое е потврдено кој ќе биде генерален увозник или дистрибутер, кога ќе започне продажбата и кои модели ќе се понудат во Македонија.
Иако за голем дел од македонските купувачи името Changan допрва треба да стане препознатливо, производителот има огромна индустриска заднина. Changan е со седиште во Чонгкинг и е меѓу најголемите кинески автомобилски групации. Во 2025 година компанијата продала 2.913.042 возила, што претставува раст од 8,54 проценти во однос на 2024 година. Од нив, 637.280 возила биле продадени надвор од домашниот пазар – раст од 18,85 проценти. Во декември 2025 година компанијата ја надмина границата од 30 милиони произведени и продадени возила низ својата историја.
Changan има и заеднички компании со Ford и Mazda во Кина, а европското присуство на производителот не започна вчера. Дизајнерски центар има во Торино, додека истражувачко-развојниот центар во Велика Британија работи од 2010 година.
Тоа е важен дел од приказната за брендот – Changan сака европските автомобили да не бидат само кинески модели донесени на нов пазар, туку производи развивани и приспособувани и со европски инженерски и дизајнерски капацитети.
Changan сериозно ја забрза европската експанзија во 2025 година. Според компанијата, на почетокот на 2026 година брендот веќе бил присутен на 15 европски пазари. Во Германија, Велика Британија и Шпанија компанијата формираше сопствени национални продажни организации, додека во други земји работи преку локални увозници и регионални партнери. Меѓу пазарите каде што Changan веќе има присуство се и Србија, Грција, Норвешка и Португалија, а експанзијата продолжува.
Европската стратегија засега е силно ориентирана кон електрифицирани автомобили. Особено важни се Deepal S05 и Deepal S07 – два SUV модели со кои компанијата го гради имиџот во Европа. S05 во верзијата со заден погон има декларирана WLTP автономија до 485 км, додека за S07 се наведуваат до 475 км.
Еден од најсилните аргументи на Changan во Европа е безбедноста. Deepal S05 освои максимални пет ѕвезди на Euro NCAP, со 94 проценти за заштита на возрасни патници и 87 проценти за деца. Поголемиот Deepal S07 исто така има пет ѕвезди од Euro NCAP.
И независните тестови покажуваат дека Changan веќе може сериозно да им конкурира на познатите марки. Британски Autocar му даде оценка 8/10 на Deepal S07, со пофалби за опременоста, инфозабавниот систем, односот цена-добиено и генерално зрелото однесување на автомобилот. Како послаби страни беа наведени просечната ефикасност и автономија во реални услови, како и побавното DC полнење во споредба со дел од конкурентите.
Changan во регионот не се потпира само на електрични автомобили. Актуелната српска понуда ги вклучува бензинските CS35 Plus, CS55 Plus и UNI-T, како и електричните Deepal S05 и Deepal S07. Најавен е и Deepal S05 PHEV, односно plug-in hybrid верзија.
Засега нема потврдена македонска гама. Но ако Changan ја следи стратегијата што веќе ја применува во Србија, логично би било понудата да содржи комбинација од класични бензински SUV модели и електрифицираната серија Deepal. Особено интересни за нашиот пазар би можеле да бидат CS35 Plus и CS55 Plus, додека Deepal S05 и S07 би биле директни конкуренти во сè побројниот сегмент на кинески електрични SUV модели.
Клучните информации што сега недостигаат се официјалниот застапник, моделската гама, цените, гаранцијата, локацијата на продажниот салон и сервисната мрежа.
🚗 Читај 24AUTO.MK и на Viber!
Автомобилски вести директно на твојот мобилен.
📲 Viber групата на семејството на 24AUTO.MK. и биди во тек!
