Toyota повеќе не е највредната компанија во Јапонија, а тоа е пресврт што не се случил повеќе од две децении. Нов лидер по пазарна вредност сега е SoftBank, откако силниот бран околу вештачката интелигенција и технолошките акции ја оттурна автомобилската групација од позицијата што ја држеше со години.
Според Reuters и Financial Times, SoftBank на 1 јуни 2026 стигнал до пазарна капитализација од околу 48,8 трилиони јени, додека Toyota паднала на околу 45,9 трилиони јени. Истовремено, акциите на SoftBank скокнале за повеќе од 14 проценти, а акциите на Toyota паднале за 4,5 проценти.
Овој пресврт не доаѓа случајно. Во центарот на приказната е глобалната еуфорија околу вештачката интелигенција, која силно ги турка технолошките компании и инвестициските групации што имаат голема изложеност на AI и чипови. SoftBank доби дополнителен импулс и по најавата за инвестиција од 75 милијарди евра во AI компјутерска инфраструктура во Франција, што уште повеќе ја засили довербата на инвеститорите.
Во исто време, овој раст го крена и јапонскиот индекс Nikkei 225 до историски нивоа. Reuters објави дека индексот за првпат ја пробил границата од 67.000 поени во текот на тргувањето, иако затворил малку под тоа ниво, што јасно покажува колку силен е AI импулсот на јапонскиот пазар.
Дополнително интересен детал е што SoftBank не се потпира само на еден наратив. Групацијата добива поддршка и од својата поврзаност со OpenAI и Arm, што ја прави особено привлечна во момент кога глобалниот капитал бара компании што можат директно да профитираат од AI експанзијата.
________________________________________________________________
▶▶▶ Добивај директно АВТОМОБИЛСКИ вести на твојот мобилен телефон, приклучи се на Viber групата на семејството на 24AUTO.MK. Со еден клик до сите вести.
_________________________________________________________________
