Nissan влегува во еден од најчувствителните периоди во својата понова историја, а новиот извршен директор Иван Еспиноса не ја затвора вратата ниту за најрадикално сценарио – продажба на компанијата. Пораката доаѓа во време на длабоко реструктурирање и барање нови партнерства.
Новиот прв човек на Nissan, Иван Еспиноса, порача дека во денешната автомобилска индустрија не треба однапред да се исклучува ниту една опција, вклучително и можноста за продажба на компанијата. Таквата изјава доаѓа во момент кога јапонскиот производител се обидува да се стабилизира по слабите резултати, падот на продажбата и зголемениот притисок од конкуренцијата.
Нissan веќе спроведува радикален план за реструктурирање. Во досегашните најави се споменуваат затворање на седум фабрики и кратење на околу 20.000 работни места, што покажува колку сериозна е внатрешната пресметка со трошоците и неефикасноста. Еспиноса паралелно инсистира дека компанијата мора многу побрзо да развива нови модели и поагилно да реагира на пазарот.
Во позадина и натаму стои пропаднатиот обид за поширока комбинација со Honda. Иако таквото сценарио не се реализира, Nissan сè уште е отворен за нови соработки, особено во области како електрификација, софтвер и развој на поевтини возила. Токму затоа изјавата дека ниту продажбата не е табу се чита како порака дека опстанокот и релевантноста на брендот се поважни од формата на идната структура.
Дополнителен проблем за Nissan е што веќе подолго време се обидува да врати ритам на клучни пазари, додека кинеските производители брзо напредуваат со поевтини и технолошки агресивни модели. Еспиноса затоа јавно признава дека за компанија со големина на Nissan веќе не е лесно самостојно да остане доволно силна во сите сегменти.
Засега нема конкретна понуда, ниту официјално потврден процес за продажба. Но самото тоа што ваква можност се споменува јавно покажува колку драматично се менува индустријата. За Nissan ова е период во кој ќе мора истовремено да штеди, да забрза развој и да одлучи со кого и како ќе ја гради својата следна фаза.
