Едeн од најлегендарните спортски автомобили во историјата, Ferrari 250 GTO, повторно е во фокус – овој пат по исклучително редок примерок наречен „Bianco Speciale“, единствениот 250 GTO кој фабрички е испорачан во бела боја. Автомобилот со шасија 3729GT ќе се најде на аукција во Мајами од 6 до 18 јануари 2026, а проценките велат дека цената може да надмине 60 милиони евра.
Ferrari 250 GTO многумина ја сметаат за „ултимативен“ автомобил. Меѓу 1962 и 1964 година се произведени помалку од 40 примероци, конструирани како оружје за трките во GT шампионатите – совршен спој од рафинирана аеродинамика и легендарна механика.
Под долгата алуминиумска хауба се наоѓа 3,0 литарски V12 мотор Tipo 168/62 Comp, со околу 300 КС и мануелен менувач со пет степени, комбинација што во своето време нудела извонредни перформанси и издржливост во трките.
Овој конкретен автомобил е единствениот 250 GTO испорачан нов во бела боја – специјална нијанса Bianco Speciale, по желба на првиот сопственик, Британецот John Coombs, познат тркачки тим сопственик и длабок познавач на моторспортот. Тој нарачал и неколку функционални измени кои и денес се видливи: дополнителни отвори на хаубата, трета решетка за воздух на крилото и цевка за вентилација на кабината поврзана со едно од предните светла. Овие детали јасно покажуваат дека автомобилот бил правен за вистинска тркачка употреба, а не за статичен експонат.
„Bianco Speciale“ има богато тркачко досие. Настапувала на врвни европски и британски патеки, освојувајќи победи во класата и бројни втори места. Зад воланот седеле легенди како Греем Хил, Мајк Перкс, Рој Салватори, Ричи Гинтер. Во 1962 и 1963 година автомобилот завршил втор во генерален пласман на RAC Tourist Trophy на Goodwood, трка која била дел од FIA GT шампионатот и директно придонела за светските титули на Ferrari. Толку била напредна што Jaguar накратко ја позајмил за споредбени тестови со сопствената E-Type – по кои и Британците морале да признаат јасна предност на GTO.
Она што ја издвојува оваа 250 GTO од многу други класични автомобили е фактот што никогаш не била агресивно реставрирана. Наместо тоа, внимателно е одржувана и поправана само кога било нужно, па денес има ниво на оригиналност што ретко се среќава. Тоа е потврдено и со Ferrari Classiche Red Book сертификат, еден од најпрестижните документи кога станува збор за автентичност на класични Ferrari модели.
Сите овие фактори – единствената бела фабричка боја, тркачкото педигре, славните возачи, историјата на сопственици и извонредната оригиналност – ја прават Ferrari 250 GTO „Bianco Speciale“ не само автомобил, туку подвижно уметничко дело и еден од најпосакуваните колекционерски примероци во светот.
