Технологијата SolidCore треба да донесе постабилен досег, побрз одзив и подобро однесување на ниски температури. Прв на ред е MG ZS Plug-in Hybrid+, а потоа треба да следуваат уште два SUV модели.
MG најавува важен чекор во својата електрифицирана понуда – од 2027 година новата SolidCore технологија со полуцврсти батерии ќе почне да се вградува и во plug-in хибрид моделите. Ова е значајно затоа што батериите од овој тип досега најчесто се поврзуваа со целосно електрични автомобили, а MG сега сака нивните предности да ги искористи и кај хибридите со надворешно полнење.
SolidCore не е класична батерија, туку полуцврста технологија што треба да биде преоден чекор меѓу денешните литиум-јонски батерии и идните целосно цврсти батерии. Според MG, во оваа батерија има само 5 проценти течен електролит, додека останатите 95 проценти се во цврста форма. Тоа треба да донесе подобра енергетска густина, поголема безбедност, побрзо полнење и подобри перформанси во студени услови.
Прв модел што треба да ја добие оваа технологија во plug-in хирид изведба ќе биде MG ZS Plug-in Hybrid+, најавен за 2027 година. Потоа, според информациите што ги пренесуваат специјализираните EV медиуми, технологијата треба да се прошири и на MG HS и MG S9, односно на три SUV модели во B, C и D сегментот.
Главната идеја не е само да се зголеми досегот на струја, туку plug-in хибрид автомобилите да работат постабилно во различни услови. MG тврди дека SolidCore батеријата треба да овозможи поконзистентна испорака на сила, подобра стабилност на досегот и подобри перформанси без разлика дали автомобилот се вози во град, на автопат, со полна батерија, со испразнета батерија или на ниски температури.
Тоа е важна точка кај plug-in хибрид моделите. Кај многу вакви автомобили, однесувањето може значително да се разликува кога батеријата е полна и кога е речиси празна. MG сака со новата технологија да го намали токму тој компромис, односно автомобилот да се однесува попредвидливо и посигурно во секојдневното возење.
Паралелно со новата батерија, MG најавува и нов Plug-in Hybrid+ систем. Тој ќе користи нови бензински мотори специјално развиени за хибридна примена – 1,1-литарски и 1,5-литарски турбо мотори. Според MG, нивната максимална термална ефикасност е над 42, односно над 43 проценти, што треба да помогне за подобра потрошувачка и поефикасно искористување на горивото.
Новиот хибриден систем користи и пренос со две клучни технологии – Power Split и Motor Decoupling. Првата технологија ја распределува силата меѓу моторот и електричниот дел според условите, додека втората го исклучува генераторот кога автомобилот вози само на струја. На тој начин се намалуваат загубите и се подобрува ефикасноста при електрично возење.
MG наведува и дека новиот Plug-in Hybrid+ систем автоматски избира како ќе работи во зависност од брзината – електрично возење при ниски брзини, комбинирана работа при средни брзини и директен погон од моторот при повисоки брзини. Според компанијата, моторот треба да работи со термална ефикасност над 40 проценти во околу 90 проценти од условите на возење, додека електричниот погон треба да достигне до 90 проценти ефикасност.
И перформансите нема да бидат споредни. MG најавува забрзување од 0 до 100 км/ч за помалку од шест секунди, како и забрзување од 80 до 120 км/ч за околу 3,5 секунди. Дополнително, подобрената испорака на вртежен момент треба да помогне при тргнување на нагорнини, каде MG најавува подобрување до 72 проценти.
Важно е и тоа што MG не го претставува SolidCore само како технологија за хибриди. Компанијата веќе најави дека SolidCore ќе се користи и кај електрични модели, почнувајќи со MG4 EV Urban во Европа. Тоа покажува дека батеријата треба да стане поширока основа за следната фаза од електрификацијата на марката, а не само еднократно решение за еден модел.
На истиот технолошки настан во Лондон, MG зборуваше и за нови системи за асистенција. Најавен е Navigate On Autopilot за крајот на 2027 година, прво кај нов SUV модел, со помош при вклучување и исклучување од автопат, избор на лента, промена на лента и претекнување, но со задолжителен надзор од возачот.
Суштината е јасна – MG сака да покаже дека иднината на електрификацијата не е само во класичните електрични автомобили, туку и во многу понапредни plug-in хибрид системи. Ако SolidCore навистина донесе постабилен досег, подобро однесување на студено и поконзистентна испорака на сила, тогаш plug-in хибрид моделите на MG од 2027 година би можеле да бидат многу поубедлив мост меѓу бензинските автомобили и целосните EV модели.
