Mercedes се соочува со сè поостра конкуренција на кинескиот пазар, а првиот човек на компанијата, Ола Кaлениус, отворено признава дека условите таму нема да станат полесни. Напротив, борбата за пазарен удел ќе се заострува и во наредните години.
„По завршувањето на пандемијата се гледа дека пазарната динамика повеќе не е онаква каква што беше пред 15 – 20 години. Покрај тоа, постои неверојатно интензивна конкуренција. На пазарот се натпреваруваат околу 100 производители на автомобили, а реално има место за 30 до 40“, изјави Келениус, најавувајќи дека следи сериозна „прочистувачка“ фаза во кинеската авто индустрија.
И покрај тоа, Mercedes не се откажува од амбициите. „Не сакаме 100 проценти од пазарот, туку наш стабилен удел. Со добра производна стратегија и правилна стратегија за индустријализација, реално е тој удел да го задржиме, па дури и да го зголемиме“, вели Келениус. Но додава и предупредување: компанијата мора да стане „повеќе кинеска“ – со повеќе локален развој, модели и технологии наменети конкретно за кинеските купувачи, според принципот „In China for China“.
Кина и понатаму е најголемиот поединечен пазар за Mercedes, пред Европа и Северна Америка. Но бројките покажуваат колку ситуацијата е предизвикувачка: во третото тримесечје од 2025 година брендот продал 125.100 автомобили во Кина, што е пад од 27 проценти во однос на истиот период претходната година, додека главниот ривал BMW бележи многу помал пад или стагнација.
Во исто време, кинеските премиум и електрични брендови агресивно освојуваат пазар – со пониски цени, брз развој на нови модели и силна локална поддршка. Премиум сегментот во Кина е силно напрегнат, а странските производители, особено европските, бележат значајни падови во продажбата, иако учеството на електрифицираните модели во вкупната продажба на Mercedes таму расте и веќе сочинува над половина од испораките.
Келениус очекува високото ниво на конкуренција да остане барем уште неколку години, до моментот кога пазарот ќе се консолидира и дел од помалите или послаби брендови ќе исчезнат. До тогаш, стратегијата на Mercedes е јасна: силен фокус на локален развој, адаптација на понудата кон кинеските вкусови и одржување на профитабилноста во услови на жесток ценовен притисок.
Компанијата отворено признава дека Кина останува клучно бојно поле – и за продажба, и за технологија, и за идниот имиџ на брендот. За Mercedes, успехот или неуспехот во Кина ќе биде директно поврзан со неговата глобална позиција во премиум сегментот во годините што доаѓаат.
