Renault подготви ново концептно издание на легендарната „четворка“ и повторно го сврте вниманието кон ретро инспирацијата. Новиот Renault 4 JP4x4 Concept ќе биде премиерно претставен на Roland Garros 2026, а носи отворена каросерија, впечатлива зелено-портокалова комбинација и електричен погон на сите тркала, создаден за песок, плажа и лесни авантури надвор од асфалтот.
Renault повторно игра на картата на емоцијата, но овојпат со многу повеќе слобода во дизајнот. Францускиот бренд го претставува Renault 4 JP4x4 Concept, нов концепт што ја оживува духот на историските изведби Plein Air и JP4, но во модерна електрична форма. Автомобилот ќе дебитира на 18 мај во рамки на Roland Garros 2026, каде Renault ќе го претстави како разиграна, летна и авантуристичка интерпретација на прочуената „четворка“.
Името JP4 е директна почит кон оригиналниот модел, но Renault му дава и ново значење. Во оваа верзија, JP4 може да се чита и како „journée à la plage“, односно ден на плажа. Тоа доволно кажува за карактерот на автомобилот. Ова не е класичен концепт насочен само кон шоу-ефект, туку возило замислено како симбол на лето, спорт, слобода и безгрижно уживање на отворено.
Renault 4 JP4x4 Concept веднаш привлекува внимание со силниот визуелен контраст. Каросеријата е обоена во бисерно зелена Emerald нијанса, додека ентериерот е изведен во впечатлива портокалова боја. Renault објаснува дека зелената е модерна интерпретација на историските Emerald и Lettuce тонови што ги краселе оригиналните „четворки“ во седумдесеттите и осумдесеттите години. Резултатот е автомобил што изгледа свежо, ведро и необично уште на прв поглед.
Концептот има две минималистички врати со класично отворање, отворена покривна структура во форма на крст и заден дел без класичен поклопец, кој се спушта како кај пикап модел. Со тоа, автомобилот добива уште посилен карактер на рекреативно возило и возило за на плажа. На покривот има даска за сурфање, а во багажникот скејтборди, детали што јасно ја заокружуваат неговата лајфстајл приказна.
Внатрешноста е замислена како модерна, проветрена и лесна, но и со јасни ретро алузии. Renault користи школкасти седишта со интегрирани потпирачи за глава, инспирирани од дизајнот на старите модели од седумдесеттите. Во кабината се комбинираат различни ткаенини, мрежести вметнувања и површини што му даваат спортски и разигран изглед. Истите материјали продолжуваат и на вратите, рабовите на багажникот и инструмент таблата.
На совозачката страна има и рачка за држење, наменета за понерамни терени, додека централната конзола е изведена како „лебдечка“, со што дополнително се нагласува чувството на леснотија во ентериерот. Renault посебно го издвојува и 3D печатениот страничен дезен, инспириран од светот на спортската облека и обувки, како уште еден елемент што го прави концептот поинаков од сè што обично се гледа во оваа класа.
Најголемото изненадување кај Renault 4 JP4x4 Concept не е дизајнот, туку техничката поставеност. Концептот е базиран на платформата на Renault 4 Savane 4×4 Concept од 2025 година и носи важна новина – дополнителен електричен мотор на задната оска. Тоа значи дека возилото добива постојан погон на сите тркала, што го прави посоодветно за движење по песок, чакал, камења и полесен офроуд.
Renault наведува дека токму овој систем покажува колкав потенцијал има платформата RGEV small за развој на електрични возила од B-сегментот со погон на сите тркала. Во превод, овој концепт не е само стилска вежба, туку и тест за идни можности во сериското производство.
За подобра подготвеност надвор од асфалтот, растојанието од подлогата е зголемено за 15 милиметри во споредба со стандардниот Renault 4 E-Tech electric. Задржани се 18-инчните тркала, но автомобилот добива специјални Goodyear UltraGrip Performance+ гуми со димензии 225/55, како и специфични „JP4“ фелни. Дополнително, трагата на тркалата е проширена за по 10 милиметри од секоја страна.
Ова е четврти концепт развиен врз основа на Renault 4 E-Tech electric, по FL4WER POWER, Savane 4×4 и Vision 4Rescue. Со JP4x4 Concept, Renault уште еднаш покажува колку е флексибилна оваа платформа и колку различни карактери може да понесе истиот модел – од урбано лајфстајл возило, до рекреативен автомобил за слободно време и авантури на плажа.
Воедно, JP4x4 Concept нема да биде единствената атракција на Renault на Roland Garros. Брендот таму ќе го прикаже и Renault 4 Roland-Garros E-Tech electric, кој исто така ќе има прво јавно појавување, и тоа во Plein Sud верзија со електрично управуван платнен покрив.
