Светот на сообраќајот се подготвува за револуција. Семафорите, симболот на редот на улиците веќе повеќе од еден век, наскоро би можеле да добијат четврта боја – бела. Ова ново светло ќе биде воведено за да ја олесни комуникацијата меѓу автономните возила и класичните автомобили, со цел побрз, побезбеден и поефикасен сообраќај.
Белото светло ќе се активира само кога на раскрсница ќе има доволно автономни возила што меѓусебно се поврзуваат и координираат преку напредни комуникациски системи. Во тие моменти, семафорот ќе ја преземе улогата на сигнален „посредник“ и ќе им даде приоритет на паметните возила за да ја оптимизираат сообраќајната динамика.
За возачите на обични автомобили, правилото ќе биде едноставно: следи го возилото пред себе. Ако белото светло свети, тоа значи дека системот е во режим на автономна контрола, па е доволно да се движите според протокот на сообраќајот. Кога нема доволно паметни возила, семафорот автоматски се враќа на класичниот режим со црвено, жолто и зелено.
Експертите предвидуваат дека воведувањето на белото светло може значително да го намали метежот на патиштата. Дури и со само 10% учество на автономни возила, можни се намалувања на застојот до 3%, а со поголем удел и до над 90%. Тоа значи помалку чекање на раскрсници, пониска потрошувачка на гориво и значително намалени емисии на штетни гасови.
Бојата бела е избрана затоа што симболизира неутралност и јасно се разликува од останатите сигнали. Таа означува момент кога технологијата ја презема контролата, а возачите имаат улога на следачи во оркестрирана сообраќајна симфонија.
Тестирањата на новиот систем најпрво ќе започнат во контролирани зони – индустриски комплекси, пристаништа и логистички центри, каде што има ограничен број пешаци и прегледни сообраќајни услови. Ако резултатите бидат успешни, очекува се белото светло да се појави и на јавните патишта во следните години.
Белото светло е само прв чекор кон иднината во која возилата, семафорите и инфраструктурата постојано ќе комуницираат меѓусебно. Наместо хаотично сопирање и чекање, сообраќајот ќе стане динамичен и координиран.
Оваа промена ќе бара и адаптација од возачите – повеќе доверба во технологијата, но и поголема дисциплина во следење на новите сигнали.
