Ford најави големо откритие поврзано со својата иднина во електричната мобилност. Извршниот директор Џим Фарли најави дека на 11 август, на настан во Кентаки, ќе бидат претставени плановите за „револуционерно електрично возило и нова платформа што ќе се развива и произведува во САД“.
„Ова за нас во Ford е момент сличен на Model T“, изјави Фарли, повикувајќи се на легендарниот автомобил што ја направи мобилна Америка во почетокот на 20 век.
Ford веќе некое време работи на таен проект, познат како „skunkworks“, со цел да создаде достапни електрични возила за широката маса. Според досегашните информации, новата платформа ќе биде основа за неколку модели – компактен SUV, мал пикап и, можеби, комерцијално возило за достава.
Иако американскиот пазар на електрични возила годинава се соочи со нестабилност поради промените во даночните олеснувања и регулативите за економичност, Ford не се откажува целосно од електрификацијата. Компанијата ги засили инвестициите во хибридни возила и во профитабилниот SUV и пикап сегмент, но ја задржува стратегијата за развој на нова генерација EV модели.
Фарли додаде дека настанот во август ќе биде „можност за претставување на нова фамилија возила со напредна технологија, одлична ефикасност, простор и функционалност“.
Во моментов, Ford нуди само три електрични модели: Mustang Mach-E, пикапот F-150 Lightning и комерцијалниот фургон E-Transit. Во споредба, General Motors веќе има речиси десетина EV модели, а Chevrolet е втор најпродаван EV бренд во САД, веднаш зад Tesla.
Новата генерација EV од Ford ќе се произведува во САД и ќе користи LFP батерии (литиум-железо-фосфат), кои се поевтини од класичните литиум-јонски. Производството на овие батерии ќе започне следната година во новиот погон BlueOval Battery Park во Мичиген, прв ваков објект во Америка.
Ford се подготвува за нова етапа – и сè изгледа дека 11 август ќе биде почеток на една сосема нова EV приказна.
