Виктор Давидовски го потврди статусот на легенда на македонскиот автомобилизам кој е првиот и засега единствен возач од Македонија што победил на TCR Europe и настапил на TCR World Tour серијата, и истовремено има трофеи и од Diamond Cup во TCR Europe каде возеше неколку сезони.
Серијата TCR European Endurance ќе добие засилување за третата трка од сезоната 2025, закажана за 21 септември на патеката Валелунга во Италија. Тимот на BRC Racing ќе настапи со Hyundai Elantra N TCR, а зад воланот ќе бидат македонскиот ас Виктор Давидовски и аргентинската ѕвезда Нестор Џиролами – Бебу.
Домаќинска трка за BRC
За BRC Racing, базиран во Чераско, ова ќе биде „домашна“ трка. Тимот е долгогодишен партнер на Hyundai, со присуство во TCR World Tour уште од 2017 година, и редовно работи со официјални возачи и возила на брендот. Со настапот на Валелунга, Hyundai Elantra ќе дебитира во TCR Endurance, откако лани на Балатон настапуваше моделот i30N.
Давидовски се враќа на голема сцена
Виктор Давидовски е добро познато име во светот на TCR – има настапувано и во TCR Europe и во глобалната TCR World Tour серија. Неговата најголема победа до сега беше токму во TCR Europe во 2022 година. Тој е првиот возачи засега единствен од Македонија што победил на TCR Europe и настапил на TCR World Tour серијата.
Џиролами – искуство и амбиција
Неговиот клупски колега, Нестор Џиролами, е поранешен вицешампион во WTCR (2022). Откако минатата година му се приклучи на тимот на BRC, Џиролами настапува на меѓународната сцена и неодамна ја забележа својата прва победа сезонава на патеката во Валенсија. Со своето 13-то место во TCR World Ranking и одлична познаеност на возилата на Hyundai, аргентинецот ќе биде клучна фигура во напорите на BRC да се вклучи во битката за победа.
Целта на Џиролами е да го изедначи успехот на својот помлад брат Франко, кој веќе има победа во оваа серија.
Календар на TCR European Endurance 2025:
30 март – Муџело
8 јуни – Словакија ринг
13 јули – Панонија ринг
21 септември – Валелунга
15 ноември – Мизано
Серијата, која стартуваше во 2024 година, се состои од двочасовни трки поделени во две етапи по 60 минути, со задолжителна пауза за промена на возачи и гуми. Стартната позиција се одредува преку две квалификациски сесии, а трките се пренесуваат во живо на TCR TV и YouTube.
Со поддршка од поранешниот бразилски возач Маврицио Славијеро и менаџерот Емануеле Малтезе, серијата забележа голем пораст и интерес во 2025 година.
