Toyota подготвува исклучително богата офанзива за 2026 година, а во фокусот се шест важни новитети што ќе ја покажат новата насока на јапонскиот гигант – повеќе електрификација, нови генерации на клучни модели и крај на неколку познати имиња.
Mеѓу најважните модели што доаѓаат се новите C-HR, RAV4, Corolla, Highlander, Lexus ES и финалната Supra, што значи дека Toyota истовремено отвора нови поглавја и затвора едно важно спортско.
Еден од најинтересните модели е новата Toyota C-HR, која се враќа како целосно електричен кросовер. Ова е голема промена за името што претходно беше поврзано со бензински и хибридни изведби, а сега во некои пазари доаѓа како EV со многу посилен карактер. Според официјалните податоци за американскиот пазар, C-HR ќе се нуди со два електромотори, погон на сите тркала и 338 КС, со батерија од 74,4 kWh. Во Европа, Toyota веќе ја претстави и C-HR+ варијантата, со автономија до 607 километри според WLTP, што дополнително покажува колку сериозно брендот го позиционира овој модел во новата EV фаза.
Многу важен новитет е и новата генерација на Toyota RAV4. Официјално претставениот модел за 2026 година влегува во шеста генерација и ќе биде достапен само како hybrid или plug-in hybrid. Toyota повеќе не гледа потреба класичната бензинска изведба да остане во понудата кај својот најважен SUV. Дополнително, новата RAV4 за првпат добива и GR Sport верзија, што треба да внесе повеќе спортски карактер во гамата.
Следна голема тема е Corolla. Иако новата генерација сè уште не е целосно откриена, Toyota веќе навестува дека подготвува сериозно освежување на еден од своите најважни модели. Според повеќе извори, идната Corolla треба да донесе значително поинаков дизајн, а се очекува да продолжи со повеќе погонски опции, вклучително и бензински, hybrid и plug-in hybrid изведби. Тоа се вклопува и во пошироката стратегија на Toyota, која не се откажува од својот повеќепатен пристап.
▶▶▶ Добивај директно АВТОМОБИЛСКИ вести на твојот мобилен телефон, приклучи се на Viber групата на семејството на 24AUTO.MK. Со еден клик до сите вести.
Најголемото изненадување во SUV понудата е Highlander. Toyota официјално потврди дека подготвува целосно електричен Highlander со три реда седишта, кој ќе се произведува во Кентаки и ќе стане еден од клучните EV модели за северноамериканскиот пазар.
Според досега објавените податоци, ќе има верзии со батерии од 77,0 и 95,8 kWh, со автономија до 320 милји, што е околу 515 километри. Овој модел е важен бидејќи покажува дека Toyota конечно сериозно влегува и во големиот електричен SUV сегмент.
На премиум страната, Lexus ES добива целосно нова генерација и за првпат ќе се нуди и како целосно електричен модел, покрај hybrid изведбата. Новиот ES е поголем од претходникот, добива порадикален дизајн и ја отвора вратата за поширока електрична понуда во Lexus гамата. Со ова Toyota Motor Corporation покажува дека електрификацијата не е резервирана само за Toyota брендот, туку се забрзува и во Lexus.
Паралелно со новитетите, 2026 ќе биде и година на збогување за Supra. Toyota веќе ја претстави MkV Final Edition, со што актуелната генерација практично влегува во својата последна фаза. Иако компанијата веќе порача дека Supra нема трајно да исчезне, актуелниот модел заминува и тоа е важен момент за љубителите на спортските автомобили.
▶▶▶ Добивај директно АВТОМОБИЛСКИ вести на твојот мобилен телефон, приклучи се на Viber групата на семејството на 24AUTO.MK. Со еден клик до сите вести.
