Новата Dacia Spring пристигнува како втора генерација на еден од најдостапните електрични автомобили во Европа. Моделот е целосно редизајниран, поставен е на новата RG-EV small платформа, се произведува во Словенија и нуди досег до 250 километри според WLTP. Dacia потврдува дека целата гама ќе чини под 20.000 евра пред државни субвенции, со што Spring повторно сака да остане еден од најпристапните влезови во електричната мобилност.
Името Spring останува, но речиси сè друго е ново. Dacia ја разви втората генерација на новата RG-EV small платформа на Renault Group, со цел пократок развоен циклус и пониски трошоци. Новата Spring е и првиот Dacia модел развиен според новите програми на Renault Group, кои имаат цел времето за развој на нов автомобил да го намалат под две години.
Моделот се произведува во фабриката Novo Mesto во Словенија. Тоа е важна промена во однос на претходната генерација и дополнително му дава европски карактер на моделот.
Поширок, поголем и попрактичен
Новата Dacia Spring е долга 3,85 метри и широка 1,74 метри без ретровизори. Во однос на претходната генерација е подолга за 15 сантиметри и поширока за 18 сантиметри.
Токму поголемата ширина носи повеќе простор во кабината и посилно присуство на патот. Dacia наведува дека Spring има еден од најпространите ентериери во електричниот A-сегмент.
Багажникот нуди до 337 литри, што е многу добра бројка за автомобил од оваа класа. Со соборени задни седишта, капацитетот расте до 1.283 литри.
Дополнително, Spring останува единствениот модел во A-сегментот со таканаречен „frunk“, односно преден багажник. Тој е опционален и нуди дополнителни 18 литри простор, доволно за кабел за полнење и друга опрема.
Електромотор со 80 КС и батерија од 27,5 kWh
Новата Dacia Spring користи електромотор со моќност од 60 kW, односно 80 КС, и 175 Nm вртежен момент.
Забрзувањето од 0 до 100 км/ч трае 12,1 секунди, а максималната брзина е 130 км/ч.
Батеријата е LFP со употреблив капацитет од 27,5 kWh. Според официјалните податоци, досегот достигнува до 250 километри според комбинираниот WLTP циклус.
Dacia посочува дека повеќето сопственици на претходниот Spring минуваат во просек 34 километри дневно. Затоа компанијата проценува дека за многу корисници едно полнење неделно ќе биде доволно.
Стандардно, Spring доаѓа со 6,6 kW AC полнач. На домашен приклучок, полнењето од 15 до 80 проценти трае околу девет часа. Со посилен приклучок времето се намалува на околу 5 часа и 40 минути, а со 7 kW wallbox на околу 2 часа и 55 минути.
Со опционалниот Fast-charge пакет, автомобилот добива 11 kW AC и 50 kW DC полнење. Тогаш батеријата може да се наполни од 15 до 80 проценти за околу 28 минути на DC брз полнач.
V2L – автомобилот може да напојува уреди
Новата Spring добива и V2L функција во рамки на Charge Pack пакетот. Тоа значи дека автомобилот може да напојува помали електрични уреди, како светилки, батерии за е-велосипеди или апарати за кафе. Оваа функција дополнително ја проширува практичноста на моделот, особено за излети и активности на отворено.
Внатрешноста е целосно редизајнирана. Хоризонталната поставеност на инструмент таблата создава чувство на поголема ширина и простор.
Пред возачот има 7-инчен дигитален екран, додека повисокото Journey ниво на опрема добива 10,1-инчен централен екран со Media Nav Live.
Системот поддржува Apple CarPlay и Android Auto без кабел, осум години поврзана навигација, информации за сообраќај во реално време, ажурирани карти, pre-conditioning на кабината и следење на возилото.
Во поосновната Expression изведба се користи Media Control, каде смартфонот има поголема улога во управувањето со медиумските функции.
Подобра секојдневна употребливост
Spring е развиен пред сè како градски автомобил, а тоа се гледа и во неговите димензии и маневрирањето. Радиусот на вртење е само 4,95 метри, што треба да го направи особено лесен за паркирање и движење низ тесни улици.
Стандардно се добиваат електрична паркирна сопирачка и задни паркинг сензори. Journey верзијата додава и камера за возење наназад.
My Safety функцијата им овозможува на возачите побрзо да ги приспособат поставките на дел од ADAS системите при стартување.
Ефикасноста е еден од главните адути на новиот Spring. Моделот тежи од 1.212 килограми, што го прави еден од најлесните електрични автомобили во сегментот.
Потрошувачката е наведена на 12,7 kWh/100 км според WLTP, што е исклучително ниска вредност. Dacia наведува и дека, благодарение на малата тежина, LFP батеријата и европското производство, новиот Spring треба да има околу 60 проценти помал јаглероден отпечаток во текот на целиот животен циклус во споредба со еквивалентни бензински модели од A и B сегментот.
Само две нивоа на опрема
Понудата е намерно едноставна. Новиот Spring ќе биде достапен во две нивоа на опрема – Expression и Journey. И двете користат ист мотор со 80 КС, иста 27,5 kWh LFP батерија и ист 6,6 kW AC полнач.
Expression носи 15-инчни тркала, мануелна клима, електрични предни прозорци и ретровизори, Media Control, задни паркинг сензори и три YouClip точки.
Journey додава 16-инчни тркала, hands-free картичка, камера за возење наназад, Media Nav Live со 10,1-инчен екран, навигација и дополнителна опрема.
Под 20.000 евра за целата гама
Најважната информација е цената. Dacia потврдува дека целата понуда на новиот Spring ќе биде под 20.000 евра пред евентуални државни субвенции.
Тоа значи дека и со новата платформа, подобриот простор, поголемата технологија и европското производство, брендот сака да го задржи Spring во улога на еден од најдостапните електрични автомобили на пазарот.
▶▶▶ Добивај директно вести на твојот мобилен телефон, приклучи се на Viber https://abit.ly/24auto-viber
Со еден клик до сите вести.
