Porsche одобри нови Continental пневматици како оригинална опрема за два свои модели. Panamera G3 II ќе може да се испорачува со SportContact 7 и новиот SportContact 7 Force, додека за Cayenne E4 во зимски услови Porsche го препорачува WinterContact TS 860 S. Сите одобрени димензии се 21 или 22 инчи и носат XL ознака за зголемена носивост.
SportContact 7 е летен пневматик развиен за прецизно и брзо управување, со смеса и шара оптимизирани за добро прилепување и краток пат на сопирање на сув и влажен асфалт. Continental наведува дека пневматикот обезбедува високо ниво на стабилност и при повисоки брзини.
За Panamera G3 II е одобрен и новиот SportContact 7 Force. Тој е развиен како уште поспортивна верзија на SportContact 7 и е насочен кон повисоки барања за стабилност и перформанси. Адаптивната шара и изменетата гумена смеса треба да овозможат попрецизно управување и подобар пренос на силата во екстремни услови, без да се загуби практичноста во секојдневното возење.
За зимски услови, Porsche го препорачува WinterContact TS 860 S за Cayenne E4. Continental го опишува како зимски пневматик развиен за моќни SUV модели со динамичен карактер. Треба да понуди кратко сопирање и прецизно управување на сув пат, како и стабилно однесување на снег. Нискиот отпор на тркалање може да помогне и за подобра ефикасност кај електричните возила.
За Panamera G3 II одобрените димензии се 275/35 ZR 21 напред и 325/30 ZR 21 назад, и за SportContact 7 и за SportContact 7 Force. Cayenne E4 со WinterContact TS 860 S користи 275/40 R22 напред и 315/35 R22 назад.
Ваквите одобренија не значат само дека гумата физички одговара на автомобилот. Кај оригиналната опрема, пневматиците се развиваат и подесуваат според конкретните барања на производителот и однесувањето на моделот, со фокус на управување, сопирање, стабилност, комфор и ефикасност. Continental нагласува дека токму ваквото фино прилагодување е важен дел од развојот на OE пневматиците.
________________________________________________________________
▶▶▶ Добивај директно АВТОМОБИЛСКИ вести на твојот мобилен телефон, приклучи се на Viber групата на семејството на 24AUTO.MK. Со еден клик до сите вести.
_________________________________________________________________
