Dacia се подготвува да ја претвори радикалната Hipster студија во сериски модел, но производството сè уште не е официјално потврдено. Според британски Autocar, автомобилот би можел да се произведува во Кина од 2027 година и да биде позициониран под новиот Spring.
Dacia Hipster беше претставен како екстремно едноставна визија за евтин градски електричен автомобил, а сега се појавуваат сè посериозни информации дека проектот може да стигне до сериско производство.
Според Autocar, производството би можело да започне во Кина во 2027 година. Carscoops дополнително наведува дека за моделот би можела да се користи фабриката во Шијан, каде претходно се произведуваше старата генерација на Dacia Spring.
Важно е дека Dacia засега официјално нема потврдено конечна одлука за производство. Извршната директорка Катрин Ад неодамна само порача да се следат идните новости за проектот.
Hipster е долг само околу три метри, широк околу 1,55 метри и висок приближно 1,54 метри. И покрај малите димензии, концептот е замислен со четири седишта. Проектот е развиван со идеја да може да се вклопи во европската L7e категорија на тешки четирицикли. Тоа подразбира значително пониска маса и поедноставна конструкција од класичен патнички автомобил.
Carscoops и Autocar наведуваат дека се разгледува батерија со капацитет од околу 15 kWh. Конечната спецификација, вклучувајќи ја хемијата на батеријата, сè уште не е потврдена.
Еден од најинтересните аспекти е цената. Извештаите зборуваат за цел под 10.000 британски фунти, односно приближно под 11.500 евра. Тоа би го поставило Hipster под новиот Dacia Spring.
Патентни цртежи што се појавија претходно покажуваат дека можната сериска верзија би можела да остане многу блиску до концептот. Промените се главно во браниците, стаклата, задниот дел и неколку детали потребни за сериско производство.
________________________________________________________________
▶▶▶ Добивај директно АВТОМОБИЛСКИ вести на твојот мобилен телефон, приклучи се на Viber групата на семејството на 24AUTO.MK. Со еден клик до сите вести.
_________________________________________________________________
