Stellantis повлекува 201.976 возила Jeep во САД поради софтверска грешка што може да го оневозможи предупредувањето за низок притисок во гумите. Интервенцијата опфаќа повеќе модели, меѓу кои Grand Cherokee, Cherokee, Wagoneer и Grand Wagoneer.
Американската Национална администрација за безбедност во сообраќајот, NHTSA, соопшти дека системот за следење на притисокот во гумите може да не го препознае падот на притисокот или да не ја активира предупредувачката светилка на инструмент-таблата.
Возењето со недоволно напумпани гуми може да ја намали стабилноста на автомобилот, да го продолжи растојанието за сопирање и да предизвика прегревање или оштетување на гумата.
Според NHTSA, софтверската грешка го зголемува ризикот од несреќа. Поради дефектот, дел од возилата не ги исполнуваат американските федерални безбедносни стандарди за системите за следење на притисокот.
Повлекувањето опфаќа одредени примероци од моделите Jeep Wagoneer, Wagoneer L, Grand Wagoneer, Grand Wagoneer L, Cherokee, Grand Cherokee, Grand Cherokee L и plug-in хибридниот Grand Cherokee 4xe. На списокот е наведен и Grand Wagoneer L PHEV.
Овластените сервиси ќе го ажурираат софтверот на модулот што управува со радиофреквентната комуникација. Интервенцијата ќе биде бесплатна за сопствениците.
Засега станува збор за повлекување на американскиот пазар. Нема официјална потврда дека истата сервисна акција е проширена и во Европа.
Сопствениците во Македонија кои поседуваат увезен Jeep од САД можат преку идентификацискиот број на возилото да проверат дали нивниот автомобил е опфатен со повлекувањето.
________________________________________________________________
▶▶▶ Добивај директно АВТОМОБИЛСКИ вести на твојот мобилен телефон, приклучи се на Viber групата на семејството на 24AUTO.MK. Со еден клик до сите вести.
_________________________________________________________________
