Кај малите автомобили, сигурноста често е еден од најважните фактори при купување. Ниските трошоци за одржување, едноставната механика и ретките дефекти можат да направат голема разлика, особено кај автомобили што секојдневно се користат во градски услови.
Најновото истражување на What Car? покажа дека неколку модели од оваа класа имаат исклучително високи оценки. Сепак, еден автомобил се издвои од сите останати – неговите сопственици во истражувањето не пријавиле ниту еден дефект во претходните две години.
Hyundai i10 се најде на врвот на листата на најсигурни мали автомобили во најновото истражување на британскиот What Car?. Актуелната генерација добила максимални 100 проценти, бидејќи ниту еден од анкетираните сопственици не пријавил дефект во претходните две години. Веднаш зад него се Toyota Aygo X, Mini hatchback, Kia Picanto и Volkswagen Polo.
Како е направено истражувањето
What Car? ги анализирал искуствата на сопственици на автомобили стари до пет години. Во предвид се земале дефектите што се појавиле во претходните 24 месеци, времето поминато во сервис и трошоците за поправка.
Врз основа на тие податоци е пресметана оценката за сигурност. Просекот за целата класа изнесува 95,8 проценти, што покажува дека малите автомобили генерално имаат многу добри резултати.
Hyundai i10 – максимални 100 проценти
На првото место е Hyundai i10 со оценка од 100 проценти.
Меѓу автомобилите вклучени во истражувањето, сопствениците не пријавиле ниту еден дефект. Немало непланирани посети на сервис, автомобили оставени на пат или трошоци за поправка.
Резултатот е уште поинтересен ако се земе предвид начинот на кој најчесто се користат ваквите автомобили. Градското возење подразбира кратки релации, чести ладни стартувања и многу работа во сообраќаен метеж.
Toyota Aygo X
Toyota Aygo X е втор со 99,7 проценти. Околу три проценти од сопствениците пријавиле проблем, но тие биле ограничени на каросеријата. Ниту еден автомобил не останал неподвижен, а сите поправки биле завршени без трошок за сопствениците и во рок од еден ден.
Овој резултат не е изненадување. Toyota Aygo X и претходно имаше исклучително силни резултати во истражувањата на What Car?, а Toyota традиционално се рангира високо и како бренд.
Mini hatchback
Трет е Mini hatchback од претходната генерација, произведуван од 2014 до 2024 година, со 99,1 проценти. Проблеми пријавиле седум проценти од сопствениците. Најчесто се работело за електрика, мултимедија или управување.
Сепак, сите пријавени дефекти биле отстранети без трошок за сопствениците. Тоа важело и за дел од автомобилите кои веќе биле надвор од стандардната фабричка гаранција.
Kia Picanto и Volkswagen Polo
Kia Picanto и Volkswagen Polo имаат идентична оценка од 98,5 проценти. Кај Picanto, проблем пријавиле девет проценти од сопствениците. Најчесто се работело за моторот или други електрични системи. Ниту еден автомобил, сепак, не бил целосно онеспособен за возење.
Кај Volkswagen Polo, дефект бил пријавен кај само пет проценти од примероците. Најчестите проблеми биле поврзани со каросеријата и климатизацијата. Трошоците за сите поправки биле покриени, но автомобилите со дефект во некои случаи останувале во сервис повеќе од една недела.
Листата на деветте најсигурни мали автомобили
- Hyundai i10 – 100%
- Toyota Aygo X – 99,7%
- Mini hatchback – 99,1%
- Kia Picanto – 98,5%
- Volkswagen Polo – 98,5%
- Hyundai i20 – 98,0%
- Fiat 500 – 97,9%
- Opel Corsa – 97,8%
- Audi A1 – 97,5%
Интересен е и фактот што разликата меѓу второпласираниот Toyota Aygo X и деветтиот Audi A1 е само 2,2 процентни поени.
Тоа покажува дека малите автомобили во ова истражување генерално се покажале како многу сигурни. При изборот, затоа, не треба да се гледа само конечниот процент, туку и какви дефекти се појавувале, колку долго траела поправката и дали сопственикот морал сам да ја плати.
________________________________________________________________
▶▶▶ Добивај директно АВТОМОБИЛСКИ вести на твојот мобилен телефон, приклучи се на Viber групата на семејството на 24AUTO.MK. Со еден клик до сите вести.
_________________________________________________________________
