Future Plan 2030 треба да ја направи Volkswagen Group побрза, поефикасна и поконкурентна во период на силен притисок од Кина, царини, високи трошоци и слаба искористеност на дел од фабриките во Европа.
Volkswagen Group влегува во најдлабоката трансформација во својата историја. Надзорниот одбор едногласно го одобри Future Plan 2030, голем план за преструктурирање со кој германската групација треба да ги намали трошоците, да ја поедностави понудата, да ги забрза одлуките и да го прилагоди производството на новата реалност на автомобилскиот пазар.
Volkswagen се соочува со многу посилен притисок од кинеските производители, високи трошоци во Европа, променета побарувачка, царински ризици и скапа транзиција кон електрични и софтверски дефинирани автомобили. Future Plan 2030 е обид групацијата да ја задржи големината, но со помалку комплексност и со многу построга контрола на трошоците.
Најчувствителниот дел е работната сила. Според анализата врз која е базиран планот, Volkswagen Group ќе треба да направи дополнително прилагодување од околу 50.000 работни позиции на глобално ниво, вклучително и менаџерски позиции. Тоа не значи дека сите мерки ќе бидат спроведени веднаш, ниту дека секоја позиција автоматски значи директно отпуштање, но јасно покажува колку голем е притисокот врз компанијата.
Целта на Volkswagen е до 2030 година да продава околу девет милиони возила годишно и да достигне оперативна маржа од девет проценти. Тоа е амбициозна цел за групација што во последните години се бори со пад на профитабилноста, поскапо производство и многу побрза конкуренција од Кина.
Планот предвидува и големо кратење на моделската понуда. До 2035 година, Volkswagen Group сака да го намали моделското портфолио за околу 50 проценти, а комплексноста на понудата – односно бројот на варијанти, опции и комбинации – за околу 75 проценти. Логиката е јасна: помалку модели, поголеми серии, пониски трошоци и поефикасен развој.
Тоа е голема промена за групација што со децении растеше преку многу брендови, многу модели и огромен број изведби. Но во новата индустриска реалност, таквата ширина станува скапа. Ако автомобилите мора да бидат електрични, софтверски надградливи, регионално приспособени и конкурентни по цена, тогаш секоја непотребна варијанта станува товар.
Посебно чувствителна е ситуацијата во европските фабрики. Volkswagen официјално признава дека производствените капацитети во Европа во моментов ја надминуваат побарувачката за повеќе од 500.000 возила. Во планот се наведува дека за фабриките во Емден, Цвикау, Хановер и Некарсулм засега не може да се обезбеди конкурентна иднина со нови производствени програми во периодот од 2031 до 2034 година.
За овие локации ќе се разгледуваат алтернативни намени и нови индустриски сценарија. Со други зборови, Volkswagen засега не кажува дека фабриките ќе се затворат, но јасно кажува дека нивната сегашна улога не е гарантирана на долг рок.
Планот предвидува и поедноставување на структурата на целата групација. Volkswagen сака помалку нивоа на одлучување, појасна одговорност, побрзи процеси и посилен фокус на основниот автомобилски бизнис. Ќе се преиспитува и инвестициското портфолио, со цел да се задржат само активности што имаат јасна стратешка и финансиска вредност. Портфолиото на удели и бизниси треба да се намали за околу една третина.
Истовремено, Volkswagen не се откажува од инвестиции. Напротив, групацијата најавува инвестиции во вредност од трицифрен број милијарди евра во следните години. За периодот од 2027 до 2031 година, целта е 135 милијарди евра за капитални инвестиции, истражување и развој. Разликата е во тоа што парите треба да се насочат кон помалку, но поважни технологии и модели.
Во технологијата, Volkswagen ќе оди кон поголема стандардизација и регионално приспособување. Платформите, електронските архитектури, системите за асистенција и софтверот треба да се усогласат според потребите на западните и источните пазари. Тоа е директен одговор на Кина, каде домашните производители многу побрзо развиваат дигитални функции, електрични платформи и модели приспособени на локалните купувачи.
Северна Америка и Кина остануваат клучни пазари, но со различен пристап. Во Северна Америка Volkswagen ќе се фокусира на најпрофитабилните сегменти, додека во Кина ќе ги приспособи очекувањата на новата пазарна реалност и ќе бара дополнителен раст преку извоз кон таканаречениот Global South.
Најголемиот предизвик ќе биде изведбата. На хартија, Future Plan 2030 звучи логично – помалку комплексност, побрзи одлуки, поефикасни фабрики, фокус на профитабилни модели и подобро користење на капиталот. Но во пракса, секоја таква промена значи тешки разговори со синдикатите, регионите, менаџментот и брендовите во рамки на групацијата.
За купувачите, ефектот нема веднаш да се види во салоните. Но на долг рок, ваков план може да значи помалку модели, помалку верзии, појасна понуда и повеќе фокус на оние автомобили што носат најголема вредност. За работниците и фабриките, пак, ова е почеток на период во кој секоја локација ќе мора да докаже дека има конкурентна иднина.
________________________________________________________________
▶▶▶ Добивај директно АВТОМОБИЛСКИ вести на твојот мобилен телефон, приклучи се на Viber групата на семејството на 24AUTO.MK. Со еден клик до сите вести.
_________________________________________________________________
