Skoda ќе го напушти кинескиот пазар до средината на 2026 година, по две децении присуство и драматичен пад на продажбата. Брендот, кој некогаш продаваше повеќе од 300.000 возила годишно во Кина, лани падна на само 15.000 испорачани автомобили, додека фокусот сега се префрла кон Индија и Југоисточна Азија.
Skoda се повлекува од кинескиот пазар по 20 години присуство, а продажбата на моделите на овој бренд во Кина ќе биде постепено укината до средината на 2026 година. Информацијата ја потврдија повеќе извори, при што Reuters наведува дека одлуката е донесена по долгорочен пад на продажбата и сè помалата можност брендот да им парира на локалните кинески производители во пазар што брзо се префрла кон електрични возила.
За Skoda, ова е крај на една важна етапа, бидејќи Кина со години беше нејзин најголем поединечен пазар. Според податоците што ги пренесуваат Reuters и други медиуми, брендот испорачуваше повеќе од 300.000 возила годишно во периодот од 2016 до 2018 година, а врвот беше достигнат во 2018 со околу 341.000 продадени автомобили. Денес сликата е целосно поинаква.
Падот почна по пандемијата и потоа стана сè подлабок. Продажбата спушти од 282.000 возила во 2019 година на 173.000 во 2020, потоа на 71.000 во 2021, 44.500 во 2022, 23.000 во 2023, 17.500 во 2024 и само 15.000 во 2025 година. Годишниот извештај на Skoda исто така потврдува дека во 2025 година во Кина се продадени 15.000 возила, што е пад од 14,5 проценти во однос на 2024 година.
Главната причина за повлекувањето е јасна – Skoda не успеа навреме да се прилагоди на огромната трансформација на кинескиот пазар, каде домашните брендови доминираат со технолошки напредни и ценовно агресивни електрични модели. Reuters наведува дека брендот имал тешкотии да остане конкурентен во EV сегментот, а South China Morning Post дополнува дека странските марки сè повеќе ја губат привлечноста на најголемиот автомобилски пазар во светот.
Дополнителен проблем е тоа што понудата на Skoda во Кина долго време не доби сериозно освежување. Токму недостигот од нови модели и иновации по пандемијата ги оттурнал локалните купувачи, кои во меѓувреме се свртеле кон кинески марки со помодерни и понапредни автомобили. Обидите за поправка на ситуацијата не дале резултат, а дури и во рамки на Volkswagen Group, фокусот во Кина сега е многу повеќе ставен на Volkswagen и Audi.
Ова повлекување, сепак, не значи целосно повлекување на групацијата од Кина. Reuters наведува дека Volkswagen и Audi остануваат клучни брендови за групацијата на кинескиот пазар, додека Skoda ќе ги пренасочи своите напори кон побрзорастечки региони како Индија и Југоисточна Азија. Тоа се вклопува и во пошироката стратегија на брендот, кој веќе бележи подобри резултати на некои други пазари надвор од Кина.
