Ултралуксузот повторно покажа дека игра по свои правила – сите планирани примероци од новиот Bugatti Tourbillon се веќе распродадени, иако производството сè уште не е ни почнато. Извршниот директор на Bugatti Rimac, Мате Римац, потврди дека сите 250 автомобили веќе имаат сопственици, со цена од околу 3,8 милиони евра без даноци, што во реалност лесно стигнува и до 4 милиони евра по автомобил.
Tourbillon беше официјално претставен во 2024 година, а производството ќе трае до 2029 година. Планот на брендот е да изработува околу 80 автомобили годишно, што значи дека дел од купувачите ќе чекаат по неколку години за да го добијат својот примерок.
„Морам да ве разочарам – веќе немаме ниеден за продажба“, изјави Римац на еден автомобилски настан, потврдувајќи дека книгата на нарачки е целосно пополнета.
Хибриден монструм со V16 и 1.800 коњски сили
Bugatti Tourbillon е првиот целосно нов модел на Bugatti во последниве дваесет години и воедно првиот што е развиен од почеток до крај под капата на Bugatti Rimac, со клучен развоен центар во Хрватска. Под задниот дел се крие атмосферски 8,3-литарски V16 мотор развиен во соработка со Cosworth, кој сам по себе испорачува околу 1.000 КС и околу 900 Nm.
На тоа се додаваат три електромотори – два на предната оска и еден назад – секој со значителна моќност. Комбинирано, системската моќност се искачува на околу 1.800 КС, со погон на сите четири тркала. Во пакетот е и батерија од приближно 25 kWh, која овозможува околу 60 km чисто електрично возење, а сепак масата на автомобилот останува под 2 тони, на ниво слично со претходникот Chiron.
Перформансите се брутални, како што и доликува на Bugatti:
– 0-100 km/h за околу 2 секунди
– 0-200 km/h за помалку од 5 секунди
– 0-400 km/h за под 25 секунди
Максималната брзина е електронски ограничена на околу 445 km/h.
Дизајн што спојува традиција и футуризам
Tourbillon визуелно останува верен на ДНК на Bugatti – препознатливата подковеста маска, драматичните пропорции и силуетата на хиперавтомобил – но со многу почисти, модерни линии. Вратите се отвораат нагоре во стил на „пеперутка“, а карактеристичниот централeн „рбет“ по целата должина на каросеријата е омаж на историјата и моделите како Type 57 SC Atlantic.
Во кабината нема доминација на екрани – наместо тоа, фокусот е на механички инструменти инспирирани од врвното часовничарство, фиксна централен дел на управувачот и исклучително рафинирани материјали. Седиштата се фиксирани, а наместо нив се поместуваат педалите, за возачот да може прецизно да ја намести својата позиција. Сè е дизајнирано Tourbillon да изгледа и да се чувствува како механичко уметничко дело, а не само како уште еден супербрз автомобил.
Луксуз што не познава криза
Она што дополнително привлекува внимание е контекстот – додека голем дел од автомобилската индустрија се бори со пад на побарувачката, електрификација, регулации и притисок врз цените, ултралуксузниот сегмент очигледно не знае за криза. Tourbillon чини неколку милиони евра, а сите примероци се распродадени уште пред да излезе првиот автомобил од фабрика.
Од перспектива на брендот, строго ограничената серија од 250 автомобили и одбивањето да се зголеми квотата и покрај огромната побарувачка ја чува ексклузивноста и митот околу Bugatti. За потенцијалните купувачи, пак, пораката е јасна – ако не си реагирал навреме, следната шанса веројатно ќе ја чекаш барем уште една деценија.
А за Мате Римац, ова е уште една потврда дека комбинацијата од екстремна технологија, хибридна моќ и култен бренд може да создаде производ што се распродава уште пред да постои на патиштата.
