Volkswagen ја одбележува 50-годишнината на GTI со светска премиера на целосно електричниот ID.3 GTI, најмоќниот сериски GTI модел во историјата на брендот. Новиот електричен спортски хечбек располага со 240 kW, односно 326 КС, 545 Nm вртежен момент и забрзување од 0 до 100 км/ч за 5,6 секунди. Во исто време, останува практичен автомобил за секојдневна употреба, со досег до 601 километар.
Volkswagen го претставува ID.3 GTI токму во годината кога GTI слави половина век. Моделот е поставен како врвна спортска изведба во гамата на ID.3 и прв вистински електричен GTI со сериска перспектива.
Електромоторот е поставен на задната оска и испорачува 240 kW, односно 326 КС. Уште повпечатлив е максималниот вртежен момент од 545 Nm, кој е достапен веднаш. Тоа му дава на автомобилот силен одзив во секоја ситуација, без разлика дали се работи за градско возење или претекнување на отворен пат.
ID.3 GTI забрзува од 0 до 100 км/ч за 5,6 секунди, а максималната брзина е електронски ограничена на 200 км/ч. Launch Control е дел од стандардната опрема, а Volkswagen нагласува дека целта не била само да се постигнат добри бројки на хартија. Голем акцент е ставен и на чувството зад волан, благодарение на адаптивната DCC спортска суспензија, прогресивното управување и нискиот центар на тежиште.
Електромоторот се напојува од литиум-јонска батерија со 79 kWh нето капацитет. Според прелиминарните податоци, ID.3 GTI ќе нуди досег до 601 километар. DC полнењето достигнува до 183 kW, а батеријата може да се наполни од 10 до 80 проценти за околу 29 минути.
Однадвор, ID.3 GTI јасно се препознава како GTI. Напред доминира новата IQ.LIGHT LED matrix светлосна графика, а меѓу светлата има проѕирна светлосна лента со осветлено VW лого. Над неа се наоѓа најпознатиот GTI детал – црвената хоризонтална линија, инспирирана од црвената рамка на маската на првиот Golf GTI од 1976 година.
Во браникот се вградени вертикални LED елементи, кои служат како нов визуелен потпис на електричниот GTI. Под нив е црната honeycomb маска, уште еден класичен GTI мотив.
Страничниот изглед е нагласен со нови 20-инчни алуминиумски тркала, кои симболично го носат името Wörthersee. Тоа е јасна почит кон легендарниот GTI собир во Австрија. Дополнително, ретровизорите и страничните прагови се во сјајно црна боја.
Во споредба со претходниот ID.3 GTX, GTI визуелно изгледа подолг и поелегантен. Причината е новиот пристап кон боите – кровот, спојлерот и вратата на багажникот повеќе не се црни, туку се во бојата на каросеријата.
Volkswagen ќе понуди пет бои за ID.3 GTI: Tornado Red, Moonstone Grey, Scale Silver metallic, Grenadilla Black metallic и Glacier White metallic. Најважна е Tornado Red, бидејќи станува збор за боја со силна GTI историја. Таа се користела уште кај освежената прва генерација Golf GTI и со години важи за една од најпрепознатливите GTI бои.
Кабината продолжува со истата тема. Доминира комбинација од црна и црвена боја, а преку инструмент таблата се протега тенка црвена линија. Спортскиот управувач има црвена ознака на 12 часот, додека premium sport седиштата носат нова интерпретација на легендарниот тартан дезен од седиштата на првиот Golf GTI од 1976 година.
Новата дигитална поставеност вклучува поголем Digital Cockpit и 12,9-инчен централен екран со Innovision infotainment систем. Под него има посебна лента со физички команди за климатизацијата, а на централната конзола има и ротирачко копче за јачина на звук и прескокнување песни.
Една од најинтересните новини е новиот GTI mode. Со притискање на осветленото GTI копче на долниот дел од управувачот, автомобилот преминува во најспортската поставеност. Се менуваат одзивот на електромоторот, прогресивното управување и DCC спортската суспензија.
Во исто време, амбиенталното осветлување станува црвено, ID. Light трепка во црвена боја, а Digital Cockpit се префрла во GTI приказ. Дополнително, во кабината се слуша и симулиран звук на мотор со внатрешно согорување.
ID.3 GTI ќе биде достапен и со Vehicle-to-Load функција. Преку адаптер на приклучокот за полнење, автомобилот може да напојува или полни надворешни уреди. Volkswagen го наведува примерот со е-велосипеди, кои може да се транспортираат на носач и потоа да се полнат директно од автомобилот.
Меѓу опциите се и панорамски покрив, massage и memory функции за спортските седишта, 480 W Harman Kardon аудиосистем и augmented reality head-up display.
Новата генерација на Travel Assist носи уште една важна функција. Системот за асистирано надолжно и странично водење за првпат може да реагира и на семафори. Ако препознае црвено светло, системот може автоматски да го сопре автомобилот, во рамки на своите системски ограничувања. Достапна ќе биде и memory функција за Park Assist Pro.
Volkswagen наведува дека ID.3 GTI засега е near-production concept vehicle, односно модел многу блиску до сериско производство. Предпродажбата треба да започне на почетокот на 2027 година. Дел од објавените бројки, вклучувајќи ги досегот, забрзувањето и потрошувачката, засега се прелиминарни.
▶▶▶ Добивај директно вести на твојот мобилен телефон, приклучи се на Viber https://abit.ly/24auto-viber
❗❗ Со еден клик до сите вести. ❗❗
