Lynk & Co влезе во сосема нова зона со GT Concept “Time to Shine” – првиот гран туризмо концепт на брендот, претставен на Auto China 2026 во Пекинг. Станува збор за ниско, широко и технолошки амбициозно купе кое треба да покаже во кој правец ќе се движи идниот дизајн и перформансниот идентитет на марката.
Lynk & Co официјално ја претстави GT Concept како свој прв вистински гран туризмо концепт и како симболичен проект по повод десетгодишнината на брендот. Mоделот е претставен на саемот во Пекинг, а официјалното соопштение на Lynk & Co го опишува како важна пресвртница што треба да отвори нова дизајнерска и техничка фаза за марката.
Новата концептна студија има класични GT пропорции: долга е 4.780 мм, широка 2.000 мм и висока само 1.330 мм, со меѓуоскино растојание од 2.750 мм. Токму тие бројки ѝ даваат многу ниска и широка појава, а Lynk & Co нагласува дека дизајнот е обликуван околу идејата каросеријата да изгледа како да е “вајана од светлина”, со површини што визуелно се менуваат зависно од аголот и движењето. Бојата Apex Blue со ефект на течен метал и жолтите детали Spark Yellow дополнително ја нагласуваат драматичноста.
Во кабината, GT Concept користи 2+2 конфигурација и комбинира светли материјали со спортски детали. Идејата е автомобилот да не биде само агресивен концепт, туку луксузен и емоционален GT модел што нуди и визуелна ексклузивност.
Најинтересниот детаљ е копчето “+” на централната конзола. Со негово активирање автомобилот влегува во поекстремна поставка: суспензијата се спушта за 15 мм, аеродинамичните елементи напред и назад се извлекуваат, вкупната должина расте за 100 мм, а задниот спојлер се активира за поголем потисок. Тоа е еден од клучните трикови на овој концепт и главната причина зошто моделот се претставува како своевидна “мутант” гран туризмо машина што може да менува карактер.
Од техничка гледна точка, официјално е потврдено дека концептот има погон на задните тркала и шасија развиена со јасна инспирација од тркачки автомобили. Дополнително се спомнува AI систем за контрола на движењето, а декларираното забрзување од 0 до 100 км/ч е околу две секунди. Lynk & Co засега не ги открива точните податоци за силата, батеријата или архитектурата, што значи дека автомобилот сè уште повеќе служи како технолошка и дизајнерска изјава отколку како најавен сериски модел со целосно познати спецификации.
Lynk & Co нагласува дека GT Concept е создаден преку соработка меѓу европските и кинеските тимови на брендот, со силен придонес од шведскиот дизајнерски пристап што и претходно беше еден од заштитните знаци на марката. Тоа е важен детаљ, затоа што покажува дека концептот не е само шоу-автомобил за домашниот кинески пазар, туку дел од поширока визија за идентитетот на Lynk & Co на глобално ниво.
Засега нема потврда за сериско производство, но компанијата остава јасно отворена врата. Во официјалната комуникација се наведува дека повратните реакции од глобалната заедница на брендот, која брои повеќе од 1,7 милиони корисници, ќе играат важна улога во идните одлуки и можниот развој на сериска варијанта. Тоа значи дека GT Concept е и тест за публиката – ако интересот биде доволно силен, Lynk & Co може да размисли и за комерцијална верзија.
Со овој проект марката јасно покажува дека сака да излезе од рамката на “разумни” модели и да се наметне и како бренд што може да понуди спектакуларен дизајн и екстремни перформанси. Во таа смисла, “Time to Shine” е повеќе од концепт – тоа е порака за идниот имиџ на Lynk & Co.
▶▶▶ Добивај директно АВТОМОБИЛСКИ вести на твојот мобилен телефон, приклучи се на Viber групата на семејството на 24AUTO.MK. Со еден клик до сите вести.
