Осмата генерација носи целосно нов дизајн, напредна дигитална кабина и избор меѓу електричен, бензински и plug-in хибриден погон. BMW вложува околу две милијарди евра во производството на моделот и неговите батерии.
BMW ја претстави осмата генерација на Серија 3, со која најпродаваниот модел во историјата на марката влегува во технолошката ера Neue Klasse. За првпат целосно електричниот BMW i3 станува рамноправен дел од моделското семејство, заедно со верзиите со бензински и plug-in хибриден погон.
Новата Серија 3 добива дизајн што е заеднички за сите погонски изведби. Препознатливите пропорции на спортска лимузина се задржани, но каросеријата има почисти површини, скриени рачки на вратите и нова интерпретација на предната маска и светлата.
Димензиите, меѓуоскиното растојание и деталите на каросеријата малку се разликуваат меѓу електричниот i3 и верзиите со мотор со внатрешно согорување поради различната архитектура.
Ентериерот го добива системот BMW Panoramic iDrive, составен од Panoramic Vision, централен екран од 17,9 инчи и новиот BMW Operating System X. Дел од информациите се прикажуваат на долниот дел од ветробранското стакло, директно во видното поле на возачот.
За американскиот пазар е потврден BMW i3 50 xDrive со два електромотори, погон на сите тркала и 463 КС. Производителот наведува проценета автономија до 753 километри според американскиот тест-циклус и DC-полнење до 400 kW. Овие бројки не треба директно да се споредуваат со европската WLTP-автономија, која дополнително ќе биде потврдена.
Во понудата ќе има и бензински модели со 48-волтен mild hybrid систем, а на врвот ќе биде M350 xDrive со шестцилиндричен мотор. BMW потврди и plug-in хибридни изведби, но целосната европска гама и цените допрва треба да бидат објавени.
BMW вложува околу две милијарди евра во подготовката на производството. Електричниот i3 ќе се произведува во Минхен, додека бензинските и plug-in хибридните верзии ќе излегуваат од фабриката во Динголфинг. Батериите од шестата генерација ќе пристигнуваат од новиот погон во Ирлбах-Штраскирхен.
Од почетокот на производството во 1975 година досега се изработени околу 18 милиони примероци од BMW Серија 3. Новата генерација покажува дека BMW не планира нагло да се откаже од класичните мотори, туку паралелно ќе им нуди повеќе погонски опции на купувачите.
▶▶▶ Добивај директно вести на твојот мобилен телефон, приклучи се на Viber https://abit.ly/24auto-viber
❗❗ Со еден клик до сите вести.
