Рекордот е постигнат во реален сообраќај, но со внимателно планирана рута и стил на возење насочен кон максимална ефикасност.
Audi A6 Sportback e-tron performance помина 1.338 километри со едно полнење и постави Гинисов рекорд, достигнувајќи речиси двојно поголема автономија од официјалната WLTP-вредност на серискиот модел.
Зад воланот бил полскиот рели-возач Мико Марчик, кој ја започнал рутата на 11 септември и возел повеќе од 45 часа. Патувањето се одвивало на јавни патишта низ Полска, во редовен сообраќај и при температури меѓу седум и 15 степени Целзиусови.
Просечната потрошувачка изнесувала само 7,09 kWh/100 км. За споредба, официјално декларираната комбинирана потрошувачка на моделот е меѓу 13,6 и 15,8 kWh/100 км.
Рекордниот автомобил користел батерија со 100 kWh бруто, односно 94,9 kWh употреблив капацитет. Електричниот мотор развива 367 КС, а официјалната автономија на оваа верзија достигнува до 777 километри според WLTP.
Важна улога имала аеродинамиката. Со коефициент на отпор од 0,21, A6 Sportback e-tron е аеродинамички најефикасниот сериски Audi досега.
Марчик користел правилен притисок во гумите, максимално искористување на регенеративното сопирање и исклучително рамномерно забрзување. Рутата исто така била внимателно избрана.
Иако возењето се одвивало на јавни патишта, резултатот не треба да се претставува како автономија што сопствениците ќе ја постигнуваат секојдневно.
Рекордот покажува колку големо влијание имаат брзината, стилот на возење, гумите, температурата и аеродинамиката. При нормално возење, купувачите треба да се ориентираат според официјалната WLTP-вредност и условите во кои го користат автомобилот.
▶▶▶ Добивај директно вести на твојот мобилен телефон, приклучи се на Viber https://abit.ly/24auto-viber
❗❗ Со еден клик до сите вести.
