296 GT Modificata е ослободена од ограничувањата на тркачките правилници. Развива 730 КС и е околу три секунди побрза од 296 GT3 Evo на патеката Фјорано.
Ferrari ја претстави 296 GT Modificata, екстремен автомобил развиен исклучиво за возење на патека во рамките на програмата Club Competizioni GT. Моделот не е хомологиран за јавен сообраќај, но не е наменет ниту за учество во официјални трки.
Основата доаѓа од 296 GT3 Evo, но инженерите не морале да ги почитуваат правилата за GT3-категоријата и системот Balance of Performance. Тоа им овозможило да извлечат значително повеќе моќност и да ги изменат аеродинамиката, суспензијата и системите за ладење.
Во задниот дел е поставен 2,9-литарски V6 мотор со два турбополначи. Развива 730 КС и 800 Nm, што е околу 130 КС повеќе од тркачката верзија од која потекнува.
Ferrari наведува дека 296 GT Modificata ја минува патеката Фјорано приближно три секунди побрзо од 296 GT3 Evo. Тоа е огромна разлика на кратка тест-патека и покажува колку перформансите на тркачкиот автомобил се ограничени од техничките правила.
Иако станува збор за исклучително специјализиран автомобил, кабината има две седишта. Сопственикот може да вози со инструктор или да понесе сопатник за време на организираните настани на Ferrari.
296 GT Modificata ќе се произведува во строго ограничен број и ќе им биде достапна на избрани клиенти на програмата Club Competizioni GT. Ferrari не ја објави цената, ниту точниот број автомобили што ќе бидат произведени.
Ова не е замена за 296 GTB, ниту нов тркачки модел за приватни тимови. Станува збор за автомобил со кој богатите клиенти можат да добијат перформанси над тркачката верзија, без ограничувањата што важат во официјалните шампионати.
▶▶▶ Добивај директно вести на твојот мобилен телефон, приклучи се на Viber https://abit.ly/24auto-viber
❗❗ Со еден клик до сите вести. ❗❗
