Многу возачи веруваат дека по неколку часа сон или едно утринско кафе се подготвени повторно да седнат зад волан. Но експертите предупредуваат – алкохолот може да остане во организмот многу подолго отколку што повеќето мислат, а ризикот не завршува со последната испиена чаша.
Празничните периоди и прославите често се поврзани со конзумирање алкохол, но експертите предупредуваат дека тоа може да остане во организмот подолго отколку што многумина мислат, со сериозни последици ако веднаш после тоа се седи зад волан. Алкохолот долго време останува во крвотокот, што значи дека опасноста по безбедноста во сообраќајот може да трае и по завршеното пиење
Истражувањата и препораките на сообраќајните и здравствените организации покажуваат дека алкохолот не се разградува брзо и не може да се „измами“ со трикови како туширање, кафе или енергетски пијалаци. Единствениот фактор што навистина го намалува алкохолот во крвта е времето.
Во просек, човечкиот организам разградува околу 0,1 до 0,15 промили алкохол на час. Тоа значи дека по вечер со повеќе пијалаци, алкохолот може да биде присутен и следното утро или дури и попладне, иако возачот субјективно се чувствува трезен.
Колку време навистина треба да почекате пред да возите зависи од повеќе фактори – телесна тежина, пол, возраст, метаболизам, дали сте јаделе и каков алкохол сте консумирале. Подолу е прикажана ориентир табела што покажува колку време е потребно алкохолот да се разгради по различни пијалаци.
Колку време треба да почекате пред да седнете зад волан
Пијалак – Количина – Приближно време на чекање
Пиво (0,5 л) – 1 пиво – 2 до 3 часа
Пиво (0,5 л) – 2 пива – 4 до 6 часа
Вино (0,2 л) – 1 чаша – 3 до 4 часа
Вино (0,2 л) – 2 чаши – 6 до 8 часа
Жесток пијалак (0,05 л) – 1 пијалак – 2 до 3 часа
Жесток пијалак (0,05 л) – 3 пијалаци – 6 до 9 часа
Повеќе пијалаци во текот на вечерта – 12 до 24 часа
Важно е да се нагласи дека овие бројки се ориентир. Кај некои луѓе, особено кај возачи со помала телесна тежина или побавен метаболизам, алкохолот може да се задржи уште подолго.
Во Македонија, дозволената граница за возење е до 0,5 промили алкохол во крвта, додека за млади и професионални возачи важи нулта толеранција. Сепак, сообраќајната полиција постојано апелира дека и мали количини алкохол значително ги намалуваат рефлексите, концентрацијата и способноста за брза реакција.
Податоците од сообраќајните несреќи покажуваат дека алкохолот е еден од најчестите фактори за тешки последици на патиштата. Токму затоа експертите се едногласни во пораката – ако пиете, не возете, без разлика дали се чувствувате „добро“ или „способно“.
