Во 2026 фокусот на Opel се префрла на компактната класа. По лансирањето на новите SUV модели од Mokka до Frontera и новите варијанти на Grandland Electric, редот дојде на Astra. Популарниот модел од компактната класа, дизајниран, развиен и произведен во Риселсхајм, влегува во нова фаза – со поостар дизајн, повеќе технологии и повисоко ниво на комфор. Светската премиера на новата Astra и Astra Sports Tourer ќе се одржи на саемот во Брисел од 9 до 18 јануари 2026.
Клучните новитети се осветлениот логотип Opel Blitz на предниот дел, новата генерација адаптивни светла Intelli-Lux HD со над 50.000 поединечни елементи, како и Intelli-Seats седиштата кои одат стандардно уште од основната верзија. Во склад со стратегијата Greenovation, целата внатрешност користи 100 проценти рециклирани текстили, а електричната Astra Electric добива поголем домет – до 454 километри според WLTP.
Поостар Vizor и осветлен Opel Blitz
Надворешниот дизајн на Astra е значително изострен и инспириран од спортскиот Corsa GSE Vision Gran Turismo концепт. Карактеристичниот преден Opel Vizor е потесен и поцврсто исцртан, а во неговиот центар сега првпат кај Astra се наоѓа осветленото лого Opel Blitz. Од него тргнуваат светлосни линии кои хоризонтално влегуваат во предните светла и вертикално во наборот на хаубата, со што визуелно се нагласува т.н. Opel Compass како дизајнерски мотив. Целокупниот впечаток – поостар, потехнички и помодерен изглед.
Новите дизајни на 17 и 18 инчни алуминиумски бандажи, заедно со новите бои Kontur White и Klover Green, дополнително го издвојуваат моделот, а изборниот контрастен црн покрив додава уште малку динамика.
Intelli-Lux HD – повеќе од 50.000 светлосни елементи
Најголемиот технолошки скок напред е кај светлата. Новата Astra и Astra Sports Tourer добиваат Intelli-Lux HD предни светла, првпат достапни во оваа класа, директно инспирирани од поголемиот Grandland. Секое светло има над 50.000 поединечни LED елементи, што овозможува уште побрза и попрецизна адаптација на светлосниот сноп од претходните матрични системи.
Системот постојано препознава други учесници во сообраќајот и патот останува силно осветлен без да се заслепуваат возила што доаѓаат во пресрет или возат напред. Светлосниот сноп може дигитално да се прилагоди, на пример да го „води“ погледот на возачот низ свиок – во зависност од аголот на управувачот се активира дополнителен модул на соодветната страна за да се елиминираат „црни дупки“ во кривината.
Во услови на дожд или магла, системот ја прилагодува јачината на светлото за да се намали отсјајот од мокриот асфалт, и за возачот, и за возилата што доаѓаат во пресрет. Дополнително, Intelli-Lux HD препознава сообраќајни знаци и привремено ги намалува LED елементите за да не го заслепи возачот преку силен одраз од таблите.
Intelli-Seats – нов стандард за седиштата
Промените се видливи и во внатрешноста. Новиот Astra има појасен кокпит и повисоко ниво на комфор за сите патници. Од основната верзија, стандард стануваат Intelli-Seats – сопствен развој на Opel, првпат достапен во Astra. Клучниот детаљ е специјален отвор што се протега по средината на седиштето, инспириран од седла за тркачки велосипеди, со цел да се намали притисокот на опашната коска.
Овој патентиран ергономски елемент треба да обезбеди поопуштено седење и на долги релации. Дополнително, како опција се нудат повеќеподесливи AGR сертифицирани седишта за возачот и совозачот, со навлаки ReNewKnit, повеќестепено загревање, електро-пневматска лумбална потпора, масажа и меморија. ReNewKnit е моно-материјал со висококвалитетен замш изглед, 100 проценти рециклиран и целосно рециклирачки, кој за разлика од композитните материјали не мора посебно да се раздвојува, што го намалува CO2 отпечатокот и отпадот.
Greenovation во пракса и повеќе домет за Astra Electric
Во духот на Greenovation пристапот на Opel, не само седиштата туку и други површини и структури во кабината се изработени од рециклирани материјали. Истовремено, кокпитот и корисничкиот интерфејс на мултимедијата се поедноставени за поинтуитивно користење.
Во поглед на погонот, фокусот е на понатамошно подобрување на електричната изведба Astra Electric. Со новата батерија од 58 kWh, моделот нуди локално беземисионско возење со домет до 454 километри според WLTP – околу 34 километри повеќе отколку досега помеѓу две полнења.
Новитет е и функцијата V2L – Vehicle to Load. Таа овозможува со Astra Electric да се напојуваат надворешни уреди, како што се електрични велосипеди или друга опрема, директно од автомобилот, без потреба од дополнителни извори на струја, на пример на одмор или кампување.
Практичност без компромис
И покрај технолошките новитети, Astra останува верна на своите практични квалитети. Кај хечбек изведбата, во багажниот простор собира до 1.339 литри со соборени задни седишта, додека караванот Astra Sports Tourer нуди максимум 1.634 литри. Задното седиште кај караванот може флексибилно да се преклопува во однос 40:20:40, што овозможува истовремено превоз на подолги предмети и патници.
Повеќе детали за гамата мотори и верзии на новата Opel Astra и Astra Sports Tourer ќе бидат објавени околу светската премиера во Брисел на почетокот на 2026 година.
