Toyota повторно влегува во големата лига на суперспортисти. Со новиот GR GT, јапонскиот производител јасно покажува дека нема намера да ја препушти GT сцената на европските брендови. Моделот е замислен да игра на истиот терен со Mercedes-AMG GT и сличните елитни купеа, со фокус и на патеката и на патиштата.
GR GT е позициониран како духовен наследник на култните 2000GT и Lexus LFA, но во модерна, технолошки многу понапредна форма. Под алуминиумската рамка и панелите од карбонски композит (CFRP) се крие конструкција дизајнирана за висока торзиона цврстина и што е можно пониска маса. Целта на инженерите е тежина од околу 1750 килограми или помалку, со внимателно избалансирана распределба 45:55 во корист на задната оска.
Димензиите потврдуваат дека станува збор за сериозен GT автомобил – 4820 мм во должина, 2000 мм во ширина, само 1195 мм висина и меѓуоскино растојание од 2725 мм. Ниската силуета со долга хауба, агресивни светлосни групи и моќен став го прави GR GT визуелно блиску до тркачки прототип. Внатрешноста е ориентирана кон возачот, со спортски седишта, црвена кожа и Alcantara, дигитална инструмент табла со специфична GR графика и нов управувач со GR ознака.
Најголемата промена за Toyota се случува под хаубата. GR GT користи целосно нов 4,0 литарски V8 мотор со битурбо полнење – прв ваков агрегат во сериска Toyota. Моторот има сув картер за стабилно подмачкување при силни латерални сили и работа на патека. Во пакетот влегува и електромотор интегриран во осумстепен автоматски менувач позициониран назад, а погон имаат само задните тркала.
Производителот таргетира системска моќност над 640 КС и околу 850 Nm вртежен момент, со максимална брзина од околу 320 km/h. Подвозјето е подготвено за сериозна употреба – двојни носачи на сите кола, 20 инчни тркала со гуми 265/35 напред и масивни 325/30 назад, како и карбон керамички сопирачки.
Дел од техничките параметри сè уште се финализираат, а стартот на производството се очекува околу 2027 година. Сепак, веќе сега е јасно дека GR GT е најамбициозната патна спортска Toyota со мотор со внатрешно согорување во поновата историја на брендот.
