Температурите последниве денови почнува да се спуштaт, а мразот и првиот снег се веќе на прагот. Есента е длабоко влезена, а се очекува и зимата, а со неа и законската обврска да се проверат гумите и да се осигура дека возилото е подготвено за услови на лизгави патишта.
Во Македонија, задолжителната зимска опрема важи од 15 ноември до 15 март, и тоа за сите моторни возила кога се движат надвор од населено место. Тоа значи дека автомобилите мора да имаат зимски гуми на сите тркала, или пак летни гуми со длабочина на шарата од најмалку 4 мм, но во тој случај возачите мора да имаат и ланци за снег во багажникот.
На што да внимавате при проверката
Клучен симбол на кој треба да обрнете внимание е т.н. алпски симбол – познат и како 3 Peak Mountain Snowflake (3PMSF). Тоа е мала икона со снегулка во планина со три врвови, која е официјален доказ дека гумата е тестирана и одобрена како зимска според европските стандарди.
Многу гуми и понатаму имаат ознака M+S (Mud and Snow), но таа веќе не е доволна за модели произведени по 1 јануари 2018 година. Само гумите со симболот на планина со снегулка се признаваат како вистински зимски гуми.
Како да ја проверите староста
Староста на гумата може лесно да се провери преку DOT бројот на нејзината странична страна. Првите две цифри го означуваат бројот на неделата, а последните две – годината на производство.
Пример: DOT 0121 значи дека гумата е произведена во првата недела од 2021 година.
Гумите стари повеќе од 5–6 години, дури и ако имаат доволно шара, губат еластичност и својства за сопирање, особено при ниски температури.
Зошто е важно да се проверат гумите
Зимските гуми имаат помек состав и повеќе канали и ламели што овозможуваат подобро држење на патот и побезбедно сопирање. За разлика од нив, летните гуми се потврди и во студено време ја губат еластичноста, што значително го зголемува патот на сопирање и ризикот од пролизгување.
Затоа, пред да започнат вистинските зимски услови, проверете ја состојбата на гумите, длабочината на шарата и староста. Безбедноста започнува токму од местото каде што автомобилот го допира патот – гумите.
