Легендарниот Ford Mustang – симболот на американската „pony car“ култура – би можел наскоро да добие своја хибридна верзија. Според информациите на порталот Ford Authority, Ford веќе работи на електрифицирана верзија на седмата генерација Mustang (S650), интерно позната како S650E, а проектот наводно е влезен во фазата „Technology Prove-Out“. Тоа значи дека постојат вистински тест возила кои веќе ја тестираат новата технологија на патиштата.
Што точно подготвува Ford?
Деталите за проектот се сè уште тајни. Не е јасно дали се работи за „mild hybrid“, plug-in хибрид или сосема нова комбинација на бензински и електричен погон. Извештајот вели дека Ford спарил електричен мотор (или повеќе нив) со бензински агрегат, со цел да добие повеќе перформанси или подобра ефикасност.
Мистерија останува и кој мотор ќе биде основа на системот – дали легендарниот 5.0-литарски V8 ќе добие електрична помош за да ги задржи емисиите под контрола, или пак EcoBoost четирицилиндерецот ќе биде „поднадуван“ со електричен boost за да стане уште помоќен.
А што со мануелниот менувач?
Mustang е познат како еден од последните „ентузијастички“ автомобили што сè уште нуди мануелен менувач. Главниот инженер за Mustang, Лори Трансоу, веќе изјави дека Ford ќе продолжи да нуди V8 и мануелен менувач сè додека постои побарувачка. Тоа отвора интересна можност: хибрид Mustang со V8 и мануелец – нешто што би ги воодушевило пуристите ако звучи и вози како вистински Mustang.
Историја на пропуштени шанси
Ова не е прв пат да слушаме за хибриден Mustang. Ford уште во 2017 година го најави проектот, но истиот беше откажан во 2022, наводно за да се направи место за целосно електричен Mustang – кој пак никогаш не беше официјално потврден.
Mustang отсекогаш бил лакмусов тест за тоа што е подготвена да прифати американската автомобилска култура. Ако хибридната верзија стигне во продажба, тоа ќе биде клучен момент за иднината на моделот. Mustang ентузијастите се познати по тоа што сакаат звук и перформанси, а Ford ќе мора да осигура дека новиот хибрид ќе изгледа, звучи и се чувствува како вистински Mustang – инаку ризикува бунт на фановите.
Сепак, со растечката популарност на хибридите и зголемените еколошки барања, времето можеби е вистинско за овој чекор.
