Седумте најголеми производители предупредуваат дека инфраструктурата и условите на пазарот не го следат темпото на регулативата. Барањето сè уште не е прифатено од Европската Унија.
Најголемите европски производители на камиони и автобуси побараа рокот за исполнување на CO₂-целите за 2030 година да биде одложен за три години, предупредувајќи дека инфраструктурата за електрични и водородни возила сериозно заостанува зад плановите на Европската Унија.
На заеднички настап на саемот IAA Transportation во Хановер, директорите на DAF Trucks, Daimler Truck, Ford Otosan, Iveco, MAN, Scania и Volvo порачаа дека остануваат посветени на декарбонизацијата, но дека не можат самостојно да ги создадат сите услови потребни за масовна употреба на камиони без емисии.
Според податоците на Европската асоцијација на производители на автомобили – ACEA, само 2,4% од новорегистрираните тешки камиони во Европа моментално се возила без емисии. Во големи пазари како Полска, Шпанија и Италија уделот е под 1%, додека во Германија изнесува 4,3%, а во Франција 2,4%.
Производителите до 2030 година треба да ги намалат просечните емисии на новите тешки возила за 43%. Целта се зголемува на 64% во 2035 и на 90% во 2040 година. Во случај на неисполнување се предвидени високи казни, кои според индустријата би можеле да одземат милијарди евра од инвестициите во нови технологии и производствени капацитети.
ACEA наведува дека во Европа има помалку од 2.000 јавни полначи соодветни за камиони, додека за постигнување на планираното темпо би требало секој месец да се поставуваат уште најмалку 700. Дополнителен проблем се долгите постапки за приклучување на електричната мрежа, високите цени на енергијата и различните системи за патарини.
Производителите бараат забрзано поставување полначи, побрзи приклучоци на мрежата, патарини според емисиите и реинвестирање на приходите од тргувањето со емисии во инфраструктурата.
Сепак, засега станува збор само за барање на индустријата. Европската Унија не донела одлука за одложување на роковите. Евентуалната промена ќе биде важна и за балканските превозници, особено за компаниите што редовно работат на пазарот на ЕУ и во иднина ќе мора да ги приспособуваат своите возни паркови.
▶▶▶ Добивај директно вести на твојот мобилен телефон, приклучи се на Viber https://abit.ly/24auto-viber
❗❗ Со еден клик до сите вести. ❗❗
