Volvo Cars, шведскиот производител на автомобили под контрола на кинеската групација Geely, објави дека ќе укине околу 3.000 административни работни места на глобално ниво. Овој потег е дел од стратегијата за намалување на трошоците и промена на фокусот – од целосно електрични возила кон plug-in хибриди.
Околу 15% од канцелариските позиции на Volvo ќе бидат погодени, при што најголемиот дел од отпуштањата ќе се случат во Шведска.
Извршниот директор Хакан Самуелсон изјави дека автомобилската индустрија се соочува со тешки времиња и дека компанијата мора да преземе „структурни мерки за намалување на трошоците“.
Промената доаѓа поради високите цени на суровините за батерии и намалената побарувачка за целосно електрични возила. Во првиот квартал од 2025 година, уделот на целосно електрични автомобили во продажбата на Volvo паднал од 21% на 19%.
Покрај отпуштањата, компанијата планира дополнителни заштеди од 18 милијарди шведски круни (околу 1,9 милијарди долари), а трошоци за реорганизацијата во износ од 1,5 милијарди круни ќе бидат евидентирани во вториот квартал.
