Volkswagen јасно става до знаење дека респектираниот натпис GTI ќе ја преживее транзицијата кон електричен погон, а најновите информации сугерираат дека нивната стратегија вклучува и претворање на ID.3 во модел со оваа ознака – и тоа порано отколку што се очекуваше. По концептот ID. GTI, кој навести што да очекуваме од ID.2 GTI, сега шпекулациите велат дека на ред е ID.3 со трите легендарни букви.
Според германскиот Auto Motor und Sport, идниот ID.3 GTI ќе биде позициониран над ID.3 GTX Performance. Овој GTX модел има батерија од 79 kWh и заден електромотор со 326 КС и 545 Nm, што овозможува забрзување до 100 km/h за 5,7 секунди и WLTP домет до 602 километри.
Интересно е тоа што и новиот ID.3 GTI ќе остане со задно погонски систем. Се очекува благо зголемување на моќноста – околу 340 КС – но фокусот нема да биде само на силата. Наместо тоа, ќе се работи на обемни измени на шасијата за уште повешто управување, што сугерира дека новиот електричен GTI ќе нуди динамика и поврзаност со возачот во стилот на класичниот GTI.
Дизајнерски, ID.3 GTI ќе се инспирира од традиционалните GTI елементи, со изразен спортски изглед. Ќе ги преземе и техничките унапредувања од GTX верзијата – подобрено управување, суспензија и адаптивен DCC систем – со цел да се креира вистински електричен хот-хеч кој нуди и перформанси и задоволство во возењето, во ерата на нулта емисија.
