Европската унија подготвува нови измени во правилата за сертифицирање на plug-in хибридните електрични возила (PHEV), кои комбинираат електромотор и мотор со внатрешно согорување и можат да се полнат од електричната мрежа.
Новите регулативи се насочени кон ревизија на начинот на кој се пресметуваат CO2 емисиите на овие возила, со цел да се добијат резултати поблиски до реалната употреба. За разлика од досегашната методологија, која се базираше на оптимални услови и претпоставено често полнење на батеријата, Европската комисија планира да ги користи податоците од реална телеметрија.
Тие покажуваат дека многу возачи ги полнат своите PHEV многу поретко од очекуваното, што доведува до почеста употреба на бензинскиот мотор и повисоки емисии.
Како последица, просечните емисии на CO2 би можеле речиси да се удвојат, што ќе доведе до губење на статусот на „еколошки возила“ за plug-in хибридите. Во некои земји на ЕУ, ова автоматски значи губење на државните субвенции за купување, како и даночните олеснувања.
Дополнително, тие повеќе не би се сметале за „чисти возила“ во квотите на производителите, што би можело да резултира со големи финансиски казни за автомобилските компании.
Автомобилската индустрија веќе изрази загриженост. Производителите посочуваат дека PHEV возилата се клучен транзициски чекор меѓу класичните и целосно електричните возила. Тие често се користат само на струја во градски услови, а современите модели нудат и до 100 km електричен досег со брзо полнење.
Во изјава за полското списание Auto Swiat, претставник од индустријата предупреди: „Новите правила може да го уништат овој сегмент. Ќе дојде до намалување на инвестициите, затворање фабрики и загуба на илјадници работни места.“ Производителите повикуваат Европската унија да ги земе предвид и економските и социјалните последици, не само лабораториските податоци.
