Италија стартува со еден од најагресивните програми за субвенционирање на електрични возила во Европа. Благодарение на новите државни поддршки и дополнителните попусти од производителите, електричната Dacia Spring може да се купи за само 3.900 евра, додека кинескиот Leapmotor T03 е достапен по цена од 4.900 евра.
Државни субвенции и програма за рециклирање
Овој драматичен пад на цените е резултат на новата владина програма вредна 597 милиони евра, која има за цел да ја поттикне продажбата на електрични автомобили и истовремено да ги отстрани од улиците постарите возила со високи емисии.
За да се квалификуваат за најголемиот попуст – 11.000 евра, купувачите мора:
да предадат стар автомобил со емисии Euro 5 или постар,
да имаат годишен приход под 30.000 евра,
и да живеат во урбани средини со повеќе од 50.000 жители.
За домаќинствата со приход под 40.000 евра, субвенцијата изнесува 9.000 евра.
Попусти од производителите
Dacia ја намали каталошката цена на Spring од 17.900 на 14.900 евра, а со државниот попуст од 11.000 евра – финалната цена за одредени категории купувачи изнесува само 3.900 евра.
Слично, Leapmotor ја намали цената на својот модел T03 од 18.900 на 15.900 евра. Со субвенциите, Италијанците можат да го купат овој целосно електричен хечбек за само 4.900 евра.
Маркетингот на Leapmotor е особено агресивен: во рекламите истакнуваат дека автомобилот „чини помалку од она што сте го платиле за вашиот велосипед“.
Италија сака да ја стигне Европа
Италија заостанува зад европскиот просек кога станува збор за електрификацијата. До август оваа година, само 5,2% од сите нови возила продадени во земјата биле електрични, во споредба со 15,8% просек во Европската унија, според податоците на ACEA.
Со новиот пакет стимуланси, владата сака не само да ја зголеми продажбата на електрични возила, туку и да ја намали загаденоста од старите возила, особено во густо населените градови како Рим, Милано и Наполи.
„Електричен автомобил за цената на велосипед“
Со вакви цени, електричните автомобили за првпат стануваат достапни за семејства со понизок приход. Dacia Spring и Leapmotor T03 не се премиум модели, но нудат практичност и економичност за градско возење – со нула емисии и минимални трошоци за одржување.
Со оваа стратегија, Италија би можела да стане пример за тоа како субвенциите можат радикално да ја забрзаат транзицијата кон електрична мобилност.
