Возот NaMo Green Rail е првиот домашно развиен индиски патнички воз на водород. Ќе сообраќа на релацијата Џинд – Сонипат во сојузната држава Харијана, како дел од планот за почист железнички транспорт.
Индија го пушти во работа својот прв патнички воз на водород, со што влезе во малата група земји што ја користат оваа технологија во железничкиот сообраќај. Возот беше официјално пуштен од индискиот премиер Нарендра Моди на станицата Џинд во Харијана, а проектот е претставен како важен чекор кон почиста железница и намалување на емисиите од транспортот.
Новиот воз ќе сообраќа на линијата Џинд – Сонипат во рамки на Северната железница. Рутата ги поврзува Џинд, Гохана и Сонипат, со повеќе меѓустаници, а е избрана како пилот-делница за проверка на технологијата во реални услови на редовен патнички сообраќај.
За разлика од класичните електрични возови што ја земаат струјата од надземна контактна мрежа, овој воз произведува електрична енергија сам во возот. Системот работи со водородни горивни ќелии, каде водородот реагира со кислород, а резултатот е електрична енергија, топлина и водена пареа. Тоа значи дека при самото користење возот нема класични издувни гасови како дизел локомотивите.
Индискиот воз е составен од 10 вагони, односно два погонски водородни вагони и осум патнички вагони. Капацитетот е околу 2.600 патници, што е значително повеќе од дел од досегашните водородни патнички возови во светот, кои најчесто имаат два до четири вагони и се користат на пократки регионални линии.
Погонскиот систем има моќност од 1.200 kW. Возот е одобрен за оперативна брзина од 75 км/ч на делницата Џинд – Сонипат, додека проектната максимална брзина е 110 км/ч. Reuters наведува дека оваа линија е долга околу 90 километри и дека возот ќе сообраќа двапати дневно.
Важен дел од проектот не е само возот, туку и целата инфраструктура околу него. Во Џинд е изградена најголемата железничка станица за полнење водород во Индија. Водородот се произведува на лице место преку електролиза, потоа се компримира до 500 bar, а возот се полни преку два независни диспензери со регулиран притисок од 350 bar.
Според индиските власти, станицата може да складира речиси 3.000 килограми водород, што е доволно за редовно работење на возот. Системот за складирање и снабдување е одобрен од индиската Petroleum and Explosives Safety Organisation, што е важно бидејќи водородот бара многу строги безбедносни протоколи.
Токму безбедноста е една од темите што најмногу се нагласуваат. Возот има повеќеслојни системи за детекција на истекување водород, топлина, пламен и чад, како и системи за вентилација и автоматско исклучување на доводот. Целта е да се спречи акумулација на гас и да се обезбеди стабилна работа во редовен сообраќај.
Оваа технологија не доаѓа како замена за целата електрификација. Индиската железничка мрежа во голема мера веќе е електрифицирана, но водородните возови можат да бидат интересни за делници каде поставувањето контактна мрежа е скапо, технички сложено или неисплатливо. Во такви случаи, воз што сам произведува струја во движење може да биде почиста алтернатива на дизелот.
Bharat’s First Hydrogen Train! 🇮🇳
Coming soon… pic.twitter.com/Mtq72zd1Dd— Ashwini Vaishnaw (@AshwiniVaishnaw) August 12, 2025
Индија со ова им се приклучува на земји како Германија, Јапонија, Кина и САД, кои веќе развиваат или тестираат водородни железнички решенија. Германија беше меѓу првите што воведе комерцијални патнички возови на водород, но индискиот проект е интересен поради капацитетот од околу 2.600 патници и обидот технологијата да се тестира во услови на голема побарувачка.
Сепак, водородните возови не се магично решение. Прашањата околу цената на производство на зелен водород, ефикасноста, инфраструктурата и одржувањето ќе бидат клучни за тоа дали технологијата ќе се прошири во голем обем. Но како пилот-проект, NaMo Green Rail е важен чекор – не само за Индија, туку и за пошироката дебата околу тоа каде водородот има најмногу смисла во транспортот.
________________________________________________________________
▶▶▶ Добивај директно АВТОМОБИЛСКИ вести на твојот мобилен телефон, приклучи се на Viber групата на семејството на 24AUTO.MK. Со еден клик до сите вести.
_________________________________________________________________
