Пазарот на електрични автомобили во Европа во октомври забележа силна динамика, а на врвот на листата на најпродавани модели се најде Skoda Elroq. Новиот електричен SUV оствари 11.441 регистрација и ја презеде водечката позиција, потврдувајќи го зголемениот интерес за новите BEV модели во европските земји.
Податоците од октомври покажуваат дека европскиот пазар на електрични автомобили станува се поконкурентен, со брз подем на нови модели и значајни промени во досегашните пазарни позиции.
На второто место се пласира Renault 5 со 9.539 продадени примероци, модел кој бележи значителен раст и брзо се наметнува како еден од најбараните електрични автомобили во моментот. Третата позиција ја зазеде Volkswagen ID.4 со 7.018 регистрации, задржувајќи стабилно присуство меѓу најпродаваните модели.
Следуваат Volkswagen ID.7, кој бележи раст од 31 проценти и се искачи на четвртото место, како и Volkswagen ID.3 со 6.741 регистрација. Во првата десетка се најдоа и BMW iX1 со 6.191 продаден автомобил и Skoda Enyaq со 6.170 регистрации, што ја потврдува силната позиција на овие модели во електричниот сегмент.
Tesla Model Y, кој долго време беше лидер на европскиот пазар, во октомври падна на осмото место со 5.545 регистрации и забележа пад од 37 проценти во однос на претходниот период. Листата на десетте најпродавани електрични автомобили ја заокружуваат Kia EV3 со 5.046 и Volvo EX30 со 4.640 продадени примероци.
