Европската унија воведува ново правило кое ќе го промени начинот на кој возиме – задните светла отсега ќе мора да бидат вклучени и во текот на денот. Оваа регулатива стапува во сила за сите нови модели хомологирани по 22 септември 2024 година, а целта е едноставна: поголема видливост и значително помалку сообраќајни несреќи.
Досега дневните светла се однесуваа главно на предните LED светла, додека задниот дел од автомобилот често остануваше во темница дури и кога условите на патот бараа поголема видливост. Новата норма го решава токму тој проблем. Задните светла ќе мора да се вклучат автоматски секогаш кога интензитетот на светлина ќе биде помал од 7.000 лукс – што значи облачен ден, магла, дожд, сумрак и други ситуации со ограничена видливост.
Оваа промена се смета за „конечно исправен чекор“, бидејќи голем дел од возачите погрешно веруваат дека со вклучени дневни светла автомобилот е целосно видлив. Во пракса, возачи кои доаѓаат одзади често не гледаат ништо – што доведува до ризични ситуации.
Постарите модели не се погодени од промената, но од 2027 година се разгледува можност за ограничување на продажба на возила кои нема да го имаат овој систем. Производителите веќе го внедруваат, а дел од нив најавуваат и потполно автоматизирани светлосни системи кои ќе реагираат на секоја промена во условите на патот.
Новото правило најавува поголема безбедност за сите учесници во сообраќајот и подобра меѓусебна видливост – особено во зимскиот период, кога условите често знаат да изненадат.
