По милијарда евра инвестиции и неисполнети очекувања, Alfa Romeo повторно го менува правецот – бензинците се враќаат, а плановите за голем електричен SUV се откажани.
Возобновата на Alfa Romeo не оди според планот. И покрај милијарда евра вложени во платформата Giorgio, моделите Giulia и Stelvio никогаш не ги постигнаа очекувањата – ниту на поранешниот FCA, ниту на сегашниот Stellantis. Деценија подоцна, двата автомобили сè уште се во продажба и ќе останат на пазарот барем до 2027 година. Замени се во подготовка, но нивниот развој се одвива побавно од предвиденото – делумно затоа што бензинските мотори воопшто не биле дел од првичниот план.
Вклучувањето на мотори со внатрешно согорување во следната генерација на Giulia и Stelvio е само една од неколкуте неодамнешни одлуки што ја поништуваат претходната стратегија на брендот. Alfa Romeo првично најави целосна електрификација до крајот на деценијата – но тоа повеќе не важи. Слична судбина има и амбициозниот план за голем електричен SUV за американскиот пазар, кој според сè, е целосно напуштен.
Поранешниот директор Жан-Филип Импарато тврдеше дека Alfa Romeo ќе лансира голем електричен SUV во Северна Америка во 2027, како конкурент на BMW X5. Но, неговиот наследник, Санто Фичили, има поинаква визија. Во интервју за Automotive News Europe, тој изјави дека „големите автомобили не се територија на брендот“.
Од изјавата може да се заклучи дека новиот Stelvio, кој веќе беше прикажан преку тизер-фотографии, ќе биде најголемиот модел во понудата. Тој ќе ја користи STLA Large платформата на Stellantis, која е дизајнирана за возила до 5,12 метри должина, но Alfa Romeo, според сè, нема да ја искористи целосната големина. Се очекува новиот SUV да биде малку поголем од актуелниот модел (4,68 метри), но сепак далеку од класата на големите луксузни SUV-возила.
Очигледно е дека Alfa Romeo веќе не се обидува да се натпреварува со германските премиум брендови, како што беше целта пред неколку години. Тоа можеби и не е лоша стратегија – подобро е да се консолидира мал асортиман на модели, отколку да се растегнат ресурсите на премногу фронтови.
Со искористување на платформите и технологиите на Stellantis, Alfa Romeo може да развива автомобили за повеќето пазарни сегменти. Но, компанијата се обидува да не се „распрсне“, особено имајќи предвид дека моменталните продажни резултати се далеку од посакуваните.
И не се само Giulia и Stelvio во проблеми – и Tonale не бележи значаен успех. Производството беше привремено стопирано за да се усогласи со намалената побарувачка – што никогаш не е добар знак за нов модел.
Alfa Romeo, за жал, не е единствената „слаба алка“ во Stellantis. Lancia и DS се борат со слични предизвици, а од другата страна на Атлантикот, Chrysler преживува со само еден модел – Pacifica/Voyager, стар веќе неколку години.
