Renault има намера да изгради мрежа на станици за полнење на електрични автомобили долж европските автопати, објави во понеделникот одделот за услуги за електрична мобилност на францускиот производител на автомобили.
Првата станица за полнење ќе биде отворена на југот на Франција за неколку месеци, а до средината на 2024 година компанијата планира да отвори уште 200 во Франција, Белгија, Италија и Шпанија, соопшти Mobilize, додавајќи дека преговара со потенцијалните партнери за финансирање мрежата.
Новите станици за полнење ќе бидат поставени во салоните на renault во близина на излезите на автопатот и ќе бидат достапни 24 часа на ден.
За да не мора да инсталира нова електрична инфраструктура, Mobileze планира да користи стационарен систем за складирање енергија со големина на помал контејнер кој ќе може да полни до шест обични автомобили истовремено.
„Ова ќе ни овозможи да ги полниме контејнерите речиси незабележливо, без да ја нарушиме електричната мрежа“, вели Николас Шоти шефот на Mobilize Power Solutions.
Изградбата на инфраструктура за полнење и практичните решенија за возачите на подолги патувања се главните предизвици со кои се соочуваат производителите на електрични возила, бидејќи батериите покриваат помало растојание од полн резервоар гориво и им треба многу подолго за полнење.
Renault штотуку ја фаќа конкуренцијата на европскиот пазар на електрични возила, но ги забрза плановите за одвојување на својот „електричен оддел“ за да ја намали разликата со германскиот гигант Volkswagen и американската Tesla, која исто така влезе на европскиот пазар.
Tesla со години распоредува многу ефикасни супер полначи и изгради глобална мрежа од околу 30.000 брзи полначи за кои тврди дека можат да му дадат на автомобилот 200 километри досег за 15 минути.
Vw, од друга страна, очекува неговата мрежа на брзи полначи да се зголеми речиси четирикратно до 2025 година, на околу 45.000, планирајќи 18.000 полначи во Европа, 17.000 во Кина и 10.000 во Северна Америка.
Следете не и на:
