Во Volkswagen групацијата, Skoda се истакнува како бренд со најголема маржа и профитабилност. Додека VW и Audi во 2024 година забележаа пад на профитот од над 30%, што доведе до затворање на фабрики и укинување на десетици илјади работни места, во Млада Болеслав, Чешка, се слави 130-годишнината од производството на автомобили Skoda со најдобри резултати во историјата на компанијата: зголемување на профитот за 30% во однос на претходната година.
Александар Вендрих, сопственик на автосалон во Лајпциг, објаснува како Skoda се разви од некогашен евтин бренд во сериозна сила: „Ако се вратиме во деведесеттите, Skoda беше маргинална појава. Денес е сосема поинаку: брендот се етаблираше. Имам впечаток дека секое трето возило на улица е Skoda.”
Како посебен мотив за купување тој гледа во фактот што Skoda се движи кон електромобилност без акционизам, не ги присилува купувачите: „Тие сè уште нудат бензин и дизел, како и за возачите на долги релации”, вели Вендрих. Добро поминуваат, особено кај семејствата. „Луѓето се прашуваат: Каде можам да го наполнам мојот автомобил ако живеам во центарот? Не може секој да си дозволи второ или трето возило.”
„Непријател не е технологијата на погон, туку CO2″, вели генералниот директор на Skoda, Клаус Целмер. „Иднината е електрична – но мораме внимателно да управуваме на патот до неа.”
Побарувачката за исклучиво електрични возила не расте толку брзо како што се очекуваше. „Брзината на трансформација значително се забави – тоа го гледаме по бројот на нови регистрации.”
Skoda успешно продолжува да нуди возила со мотори со внатрешно согорување: моделите Fabia, Scala и Kamiq ќе останат во понудата барем до крајот на оваа деценија, потврдува Целмер. Паралелно, брендот ја проширува својата понуда на електрични модели – со Enyaq, Elroq, претстојниот Epiq и планираниот SUV за седум членови на семејството.
Една од причините за успехот на Skoda лежи во самата локација. Целмер отворено зборува за предностите во Чешка – и за она што би сакал да го види во Германија. „Нашите трошоци се значително пониски – тоа не се однесува само на платите, туку и на цените на енергијата и бирократијата”, вели тој, и го пофалува менталитетот на чешките работници: „Овде постои ‘hands-on’ дух, став дека ‘може’, кој растеше со децении.”
Ситуацијата е сосема поинаква во многу германски фабрики кои моментално имаат проблеми со вишок капацитет и структурни трошоци.
Целмер внимателно го формулира тоа, но пораката е јасна: „Она што ни треба е паневропски пристап – во однос на субвенциите, инфраструктурата и цените на електричната енергија.”
Многу се зборува за успехот на Чесите во рамките на Volkswagen. Неофицијално, може да се слушне дека во Волфсбург, во седиштето на концернот, некои со доза на завист гледаат на великаните од Чешка. Директорот на Skoda, Клаус Целмер, останува дипломатски резервиран. „Темата на завист денес е многу помалку присутна отколку порано”, вели тој во интервју за ARD.
Во рамките на таканаречената „core group of brands”, која освен Skoda ги сочинуваат и VW, Seat и Cupra, соработката функционира добро. „Се фокусиравме на конкуренцијата надвор од концернот – а има доволно.” Целмер нагласува: „Толку сме успешни и затоа што Skoda има корист од скалираните платформи во рамките на концернот.”
Skoda отсекогаш била позната по пристапните цени. И пристапен електричен автомобил добро би се вклопил во понудата. Но, тој прв е-автомобил под 20.000 евра треба да го произведе Volkswagen. Во Чешка на тоа гледаат лежерно – меѓу другото и затоа што толку евтин е-автомобил едвај носи профит.
Skoda наместо тоа се фокусира на возила со поголема маржа – и засега ѝ оди добро. Наместо заострување на конкуренцијата во рамките на концернот, тие сакаат заедно да го освојат пазарот, вели директорот на Skoda: „Не се газиме едни со други.”
Во прилог ѝ оди моментално фактот што Skoda не е целосно префрлена на електромобилност. Разновидноста во понудата на погонски склопови одлично одговара на она што го сакаат купувачите – и носи пораст на продажбата, додека другите се борат со пад.
Меѓутоа, она што е денес предност, утре може да стане проблем. Ако ЕУ навистина ги забрани моторите со внатрешно согорување, Skoda ќе мора побрзо да го промени правецот.
Но, за сега има многу знаци дека Брисел ќе попушти кога станува збор за временската рамка за трансформација. Така, Skoda, чешката ќерка на компанијата од Волфсбург, уште некое време би можела да профитира од постоечката ситуација.
