CUPRA го освежи електричниот Tavascan со нова почетна верзија од 190 КС, подобрено дигитално искуство и дополнителни технолошки функции. Првите испораки на унапредениот модел се очекуваат по летото, а производството стартува во наредните недели.
CUPRA подготви сеопфатно освежување за својот електричен Tavascan, со кое моделот добива нова почетна верзија, унапредена технологија во кабината и дополнителни функции насочени кон секојдневната употребливост. Од брендот велат дека производството на обновениот модел ќе почне во наредните недели, а првите возила ќе им бидат испорачани на клиентите по летната пауза.
Најголемата новина е новата влезна изведба со 140 kW, односно 190 КС, која треба да го направи Tavascan подостапен за поширок круг купувачи. Оваа верзија доаѓа со батерија од 58 kWh и досег од околу 435 километри со едно полнење, додека полнењето од 10 до 80 проценти трае околу 26 минути. Со неа, гамата на Tavascan сега добива уште појасна поделба меѓу пристапност, ефикасност и перформанси.
CUPRA паралелно работела и на подобрување на чувството зад воланот. Во кабината сега има ново, поголемо 10,25-инчно Virtual Cockpit, а моделот добива и нов волан со физички копчиња. Ова е значајна промена во време кога дел од производителите повторно се враќаат кон покласични команди поради полесно користење во возење.
Унапреден е и инфозабавниот систем, кој сега е базиран на најнов Android систем и носи интегриран App Store, со што корисниците добиваат полесен пристап до апликации и познати smartphone функции директно во автомобилот. Дополнително, Tavascan добива и интелигентни електронски контролирани отвори за воздух, кои автоматски се приспособуваат на условите и можат да се активираат уште пред влегување во кабината.
Во делот на дигиталниот пристап, CUPRA воведува и мобилен клуч, што значи дека автомобилот може да се отклучи и стартува преку паметен телефон. Може да се споделат до четири дигитални клучеви, додека петтиот останува резервиран за главниот корисник. Дополнително, функциите Open on Approach и Walk Away Lock треба да донесат повеќе удобност во секојдневното користење.
Практичноста е дополнително зголемена и со Vehicle-to-Load функцијата, преку која батеријата на автомобилот може да напојува надворешни уреди како лаптопи, електрични велосипеди или аудио опрема. Тоа значи дека Tavascan не е само електричен SUV-купе, туку и мобилен извор на енергија кога е потребно.
CUPRA не заборава ниту на динамиката. Launch Control ќе биде достапен кај верзиите со поголемата батерија од 77 kWh, а моделот добива и One-Pedal-Drive функција, која овозможува забрзувањето и забавувањето да се контролираат речиси целосно преку педалата за гас. Тоа не само што го прави возењето поинтуитивно, туку помага и за поголема енергетска ефикасност, особено во градски услови.
Освежениот модел добива и подобрен Sennheiser аудио систем со 12 звучници, а новитет во понудата е и надворешната боја Midnight Black, која треба дополнително да ја нагласи агресивната и луксузна појава на Tavascan. Со ова освежување, CUPRA јасно покажува дека сака Tavascan да остане еден од највпечатливите електрични модели во својата класа, не само по дизајн, туку и по технологија и употребливост.
