Точно 26 години моделот Ypsilon е дел од понудата на Lancia. Овој модел ги преживеа кризите во Fiat, а потоа и во FCA. Сега, обновениот Ypsilon е предвесник на враќањето на италијанскиот бренд на европската карта на автомобилизмот.
Станува збор за втор фејслифт на третата генерација која е претставена во 2011 година, а која во моментов се продава само во Италија.
Она што е ново во однос на актуелниот модел, е новата предна решетка како и новите LED светла, на предниот дел додека пак на задниот дел нема измени. Сепак, и покрај тоа, фејслифтот изгледа привлечно и ја истакнува убавината на италијанскиот дизајн кој е дел од ДНК-та на Lancia.
Измени нема во внатрешноста каде домнира 7,0 инчниот екран осетлив на допир. Тука е и унапредениот инфотејнмент систем кој доаѓа со најновата верзија на Apple CarPlay и Android Auto.
Lancia Ypsilon 2021
Во однос на мотористиката нема никаква измена. Во понудата и натаму останува 1,2 литарскиот бензински мотор со 51 kW односно 69 КС. Тука е и 0,9 литарскиот со 85 КС и 145 Nm.
Секако, дел од понудата останува и хибридната верзија која доаѓа со 1,0 литарски трицилиндрен мотор и 70КС во комбинација со 12 волтен mild хибриден систем. На купувачите на располагање им стои и новата Elegant Blue боја, неколку нови фелни како и комбинации на ткаенини во внатрешноста.
Минатата година, покрај кризата предизвиката од пандемијата на коронавирусот, но и тоа што се продава само во Италија, Lancia испорача 43.076 примероци од овој модел што е најмалку од самото лансирање на овој модел во 1995 година.
Следете не и на:
