Нови информации од европската база за повлекувања покажуваат дека Stellantis повлекува повеќе модели поради проблем со електричниот серво управувач, кој во одредени случаи може да предизвика краток спој, губење на помошта при управување, па дури и пожар во патничката кабина. Станува збор за моделите Citroen C3, Citroen C3 Aircross, Fiat Grande Panda и Opel Frontera.
Причината кај сите четири случаи е иста. Инсталацијата на електричниот серво управувач е поставена меѓу две завртки, а мали вибрации при вртење на воланот можат да предизвикаат оштетување на инсталацијата. Последицата може да биде краток спој, губење на асистенцијата на управувањето и/или пожар во внатрешноста на возилото.
Кај сите овие повлекувања е наведена и иста вкупна бројка од 68.137 возила на глобално ниво, но таа е збирна за сите погодени модели на Stellantis, а не за секој модел одделно.
Кај Citroen C3, повлекувањето се однесува на возила произведени меѓу 21 февруари и 21 мај 2025 година. Наведениот recall code е GW9, а VIN опсегот е од VR7CBZYA7RT176772 до VR7CCHPVXTT000267. Во самата објава се наведува и дека меѓу засегнатите модели се C3 и C3 Aircross.
За Citroen C3 Aircross, засегнатите примероци се произведени меѓу 24 февруари и 21 мај 2025 година. И тука recall code е GW9, додека VIN опсегот е од VR7CGHPV5RT163339 до VR7CGHPY5TT000241. И во овој случај, во објавата се наведува дека засегнати модели се C3 и C3 Aircross.
Кај Fiat Grande Panda, повлекувањето опфаќа возила произведени меѓу 14 август 2024 и 14 април 2025 година. Recall code во овој случај е F60B, а VIN опсегот е од VYFCRZYA5SZA00225 до VYFCTHPX8SZA04268. Објавата јасно наведува дека погоден модел е Grande Panda.
Кај Opel Frontera, засегнатите возила се произведени меѓу 11 март и 21 мај 2025 година. Recall code е KV9, а VIN опсегот се движи од VXKCMZYA8RT198239 до VXKCSHPY9ST090653. Како засегнат модел е наведен Frontera.
Според објавените податоци, сите четири повлекувања се заведени како сериозен ризик од пожар, а известувањата се објавени во рамки на Alert 12/2026 и се поврзани со европскиот систем Safety Gate. Сопствениците кои се сомневаат дека нивното возило е опфатено треба да се обратат кај овластен дилер или сервис и да го проверат конкретниот VIN број.
