Volvo Cars објави дека од крајот на 2026 година, производството на најпродаваниот модел XC60 ќе се одвива и во нивната современа фабрика во Риџвил, близу Чарлстон, Јужна Каролина.
Оваа стратегиска одлука ја зајакнува позицијата на XC60 како водечки модел на американскиот пазар и ја поддржува целта на компанијата – да произведува таму каде што продава. Одлуката истовремено отвора нови работни места и го потврдува долгорочниот ангажман на Volvo на пазарот во САД, каде оваа година одбележува 70 години присуство и над 5 милиони продадени возила.
XC60 е веќе глобален бестселер со повеќе од 2,7 милиони продадени примероци, а во САД сочинува 33% од вкупната продажба на Volvo во 2025 година – од кои значителен дел се plug-in хибриди.
„Гордост ни е што ќе можеме да понудиме XC60 составен токму во САД, од американски работници,“ изјави Луис Резенде, претседател на Volvo Cars Americas.
Фабриката во Риџвил, отворена во 2015 година, веќе произведува електрични модели како EX90 и Polestar 3, а компанијата досега има вложено 1,3 милијарди долари во модернизација и проширување на капацитетите. Новото производство на XC60 дополнително ќе ја зајакне локалната економија и понудата на модели со различни погонски решенија – од благ хибрид до plug-in хибрид.
