Tesla привремено го прекинува производството на своите модели Model Y и Cybertruck во фабриката во Остин, Тексас, што е сигнал за можен пад на побарувачката – дури и за најпродаваниот модел на компанијата.
Според извештај на Business Insider, на неколку работници задолжени за склопување на Model Y им било соопштено да останат дома за време на неделата на американскиот празник Денот на сеќавањето. Истата одлука важи и за тимот задолжен за производствената линија на Cybertruck, каде вработените добиле инструкции да земат одмор во последната недела од мај.
Работниците добиле можност да искористат платен одмор или да дојдат на работа за непроизводствени активности како чистење и обуки, но склопувањето на возилата било целосно прекинато.
Некои од вработените оваа пауза ја опишуваат како „невообичаено долга“, а дополнително се забележува и сериозно намалување на прекувремените часови. Постои индикација дека менаџментот директно ги советувал работниците да избегнуваат работа надвор од основното работно време. Откако од февруари наваму се јавија непредвидливи работни распореди, некои вработени велат дека честопати биле испраќани дома предвреме.
Производството на Cybertruck веќе беше забавено и на крајот од минатата година, иако првичните податоци покажаа силен старт и краткотраен статус како најпродаван електричен пикап во САД. Но, интересот за контроверзниот модел очигледно е во опаѓање.
Иако извршниот директор Илон Маск предвидуваше до 250.000 годишни нарачки за Cybertruck, реалните бројки се далеку под тие очекувања. Дури и самата Tesla ги ревидираше своите прогнози, намалувајќи го очекуваниот годишен капацитет на 120.000 единици – бројка која сега исто така изгледа оптимистички.
Ова забавување на производството отвора прашања за идната стратегија на Tesla, особено во контекст на зголемената конкуренција и променливата динамика на пазарот на електрични возила.
