Volkswagen со месеци се заканува дека ќе ги затвори фабриките во Германија додека бара начини да ги намали трошоците и да ги обезбеди своите финансии. Сепак, надзорниот одбор на компанијата сега размислува за можноста да ги задржи отворени штo се вести кои без сомнение ќе бидат добро пречекани од вработените и локалните синдикати.
Доколку VW ги затвори фабриките во Германија, тоа ќе биде првпат во историјата на компанијата да се преземат вакви драстични мерки. Компанијата се соочува со зголемена конкуренција од новите брендови кои влегуваат на европскиот пазар, особено од кинеските производители на автомобили. Според Томас Шафер, ситуацијата „не може да се реши само со мерки за намалување на трошоците“. Во изминатите три месеци, синдикатите и VW се расправаа околу тоа кои мерки се неопходни за да се намалат трошоците.
Според германското издание „Менаџер Магазин“, членовите на одборот на VW сакале да го прекинат производството во фабриката на компанијата во Дрезден, која моментално вработува 300 луѓе. Тие, исто така, ја истражуваат можноста за продажбата на фабриката во Оснабрик, која има 2.300 работници. Сепак, неименувани извори сега тврдат дека одборот се залага да не се затворат овие погони и сè уште не назначил потенцијален купувач за локацијата во Оснабрик.
Иднината на погоните не е загарантирана во оваа фаза бидејќи сè уште се вели дека има несогласувања меѓу некои членови на одборот. Ројтерс дознава дека семејствата Пих и Порше се за поагресивни мерки за намалување на трошоците.
Во фабриката во Оснабрик моментално се производуваат Porsche Cayman, Boxster и T-Roc Cabrio. Иако има годишен капацитет до 100.000 единици, минатата година таму беа произведени само 28.000 возила. Производството на T-Roc Cabriolet исто така е планирано да заврши следната година, а Porsche го префрла производството на Cayman и Boxster на својата локација во Цуфенхаузен. Фабриката на VW во Дрезден моментално го произведува ID.3.
На почетокот на декември, речиси 100.000 работници на VW ширум Германија ги напуштија своите работни места во знак на протест против предложените екстремни мерки за намалување на трошоците. Синдикатот IG Metall понуди да се откаже од бонусите за 2025 и 2026 година, а исто така предложи да се користат пари од зголемувањето на платите за финансирање на привремено намалени работни часови за време на прекумерен капацитет. Се вели дека овие мерки би можеле да донесат 1,5 милијарди евра (1,6 милијарди долари) заштеда на трошоци.
