Шведскиот автомобилски производител Volvo се соочува со сериозна правна битка во САД, откако повеќе од 100 сопственици поднесоа колективна тужба против компанијата поради безбедносни проблеми кај електричниот модел XC40 Recharge.
Тужбата, поднесена во контекст на недостатоци во перформансите на возилото, вклучува обвинувања за ненадејно и неконтролирано забрзување и агресивни реакции на возилото, што може да доведе до сообраќајни несреќи и повреди. Според тужителите, овие појави се најчести при мали брзини, при менување на преносот или кога се користи функцијата “One Pedal Drive”.
Главниот тужител, Роберт М. Бекер, тврди дека Volvo бил свесен за дефектите, или најмалку небрежно ги игнорирал, и покрај пријави од купувачи, сервисни извештаи и резултати од пред-продукциски тестирања. Тужбата го обвинува производителот за сериозноста на проблемите, додека досегашните повици за сервис се опишуваат како „фрагментирани и премногу ограничени“.
Како пример, се наведува лично искуство на Бекер, кој во септември 2024 изнајмил модел XC40 Recharge од 2024 година, и за само неколку недели доживеал повеќе инциденти со нагло забрзување, поради што возилото било однесено на сервис.
Тужителите ја обвинуваат компанијата за лажно рекламирање, прикривање на дефекти, нарушување на закони за заштита на потрошувачи и нечесна пазарна практика, барајќи од судот:
исплата на компензациска и казнена отштета,
враќање на незаконски стекнати добивки,
и судска забрана со која ќе му се наложи на Volvo да ги отстрани сите пријавени дефекти.
Овој случај доаѓа во момент кога американската NHTSA веќе имаше предупредено за ризици кај режимот на вожња со една педала, што дополнително ја засилува јавната загриженост околу безбедноста на електричните модели на Volvo.
