Се одбележуваат 70 години од првите појаси што Volvo ги развиваше во 50-тите години од минатиот век, а компанијата го користи јубилејот за да претстави нов „multi-adaptive“ безбедносен појас. Новата технологија треба да дебитира во електричниот EX60 во 2026 година и да се приспособува на патникот и на ситуацијата на пат.
Безбедносниот појас е една од оние работи што денес ги земаме здраво за готово – додека не се потсетиме колку животи има спасено. Оваа година Volvo одбележува 70 години од своите први решенија поврзани со појасите, а јубилејот го користи како момент да покаже дека дури и оваа „едноставна“ технологија може да оди чекор напред.
Volvo е најпознат по појасот со три точки, развиен од инженерот Нилс Бохлин и воведен во сериско производство во 1959 година. Тој концепт стана глобален стандард и остана темел на пасивната безбедност во автомобилите – затоа што го држи телото стабилно при удар и ја распределува силата преку најцврстите делови од телото.
Зошто тогаш се зборува за 70 години? Бидејќи Volvo уште во средината на 1950-тите експериментирал со ран прототип и решенија со двоточки, пред да стигне до три точки како најдобра формула. Со други зборови – 70-те години е приказна за процес што почнал порано, а 1959 е моментот кога решението што го знаеме денес станало реалност на патиштата.
По повод јубилејот, Volvo најавува нов „multi-adaptive“ безбедносен појас – технологија што треба да дебитира во електричниот EX60. Идејата е појасот да не работи по принцип „една мерка за сите“, туку да се приспособува на телото и на условите во моментот. Тоа значи дека истиот појас може различно да се затегне и да работи со различна сила во зависност од тоа кој седи на седиштето и каков судир се случува.
Клучот е во податоците од сензорите на автомобилот. Системот чита информации за брзина, насока и интензитет на удар, но и за позицијата на седење и карактеристиките на патникот. Според објавените детали, новиот појас има многу повеќе „профили“ на ограничување на силата од класичните системи, што му дозволува прецизно да избере најсоодветна реакција. Практично, целта е во потежок судир да обезбеди посилно задржување кога треба, а во полесен удар да намали ризик од повреди на ребра кај помали и послаби патници.
Важен дел од приказната е и тоа што системот може да се подобрува со ажурирања преку интернет. Volvo најавува дека, како што ќе собира анонимни податоци и ќе ги анализира сценаријата, ќе може да ги усовршува поставките и логиката на појасот со текот на времето. Ова е нов пристап за пасивната безбедност – појасот да не е само механика, туку „жива“ технологија што се развива.
Секако, и со најнова технологија важи истото правило: појасот спасува животи само ако се користи правилно. Затоа и пораката на јубилејот е двојна – од една страна, прослава на иновацијата што го смени светот, а од друга, потсетник дека најважната безбедносна навика во автомобилот не е опција, туку основа.
